Link açıqlığı

Saatnıñ esas haberi

Rusiye mahkemesi tutulğan altı qırımtatarı içün sıñırlav tedbirini belgiledi


Nümüneviy fotoresim
Nümüneviy fotoresim

Rusiye kontrolindeki Aqmescitniñ Kiyev rayon mahkemesi Rusiye quvetçileri «terrorizmde» ve «Ukrayına ile bağları» olğanında şübheli sayılğan altı qırımtatarını apiske aldı. Bu aqta Rusiye ve Qırım kütleviy haber vastaları bildire.

«Krım 24» telekanalı Telegramda bildirgenine köre, Ekrem Kroş, Ayder Asanov, Refat Seydametov, Osman Abdurazakov, Leman Zekiryayev ve Halil Mambetov 2023 senesi martnıñ 24-ne qadar apiske alındı.

Yanvarniñ 24-nde saba işğal etilgen Qırımnıñ Canköy şeeri ve rayonında Rusiye quvetçileri qırımtatarlarnıñ evlerinde tintüv keçirdi: Nemse Canköy köyünde (Blijnegorodskoye) Ekrem Kroşnıñ, Timofeyevka köyünde Ayder Asanov ve Refat Seydametovnıñ, Çoqraqlı Şeyh Eli (Dneprovka) Osman Abdurazakovnıñ, Canköyde Löman Zekiryayev ve Halil Mambetovnıñ evlerinde.

Ekrem Kroşnıñ ömür arqadaşı Amideniñ «Qırım birdemligi» cemaat birleşmesine bildirgenine köre, Qırımnıñ şimalinde tutulğan qırımtatarlar «terrorizmde» qabaatlana bile. Mustaqil advokatlarğa qırımlı musulmanlarnıñ yanına keçmege izin berilmedi.

Daa soñra belli olğanına köre, yanvarniñ 24-nde saba Canköyde ve Canköy rayonında tutulğanlar terror teşkilâtını teşkil etüv ve faaliyetinde iştirak etüv ile qabaatlanalar (RF Ceza qanunnamesiniñ 205,5 maddesi – QA). Laf Rusiyede yasaqlanğan «Hizb ut-Tahrir» teşkilâtı aqqında kete.

Qırımnıñ işğal yolbaşçısı Sergey Aksenov qırımtatarlarnıñ evlerinde keçirilgen tintüvlerni izaatlap, quvetçiler «Ukrayına ile alâqalarda» qabaatlanğan altı kişini yaqalağanını bildirdi.

Ukrayına prezidentiniñ Qırım Muhtar Cumhuriyetindeki daimiy temsilciligi Qırımnıñ şimalinde Ukrayına vatandaşlarınıñ tutuluvını takbih etti.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG