Almaniya arbiy deñiz quvetleriniñ komandanı admiral muavini Kay-Ahim Şenbah Rusiye işğal etken Qırım bir vaqıt Ukraina devletiniñ terkibine qaytmaycaq beyanatı çıqarğan qavğa sebebinden istifa arizasını berdi. Şenbahnıñ beyanatı Presseportal.de portalında derc etildi.
«Federal mudafaa nazirinden meni vazifemden acele boşatmasını rica ettim (…) Almaniya, Bündesver, amma ilk evelâ Almaniya Federativ Cumhuriyetine daa çoq zarar ketirmemek içün bu adımnı zaruriy dep sayam. Federal nazir ricamnı qanaatlendirdi», – dep aytıla Şenbahnıñ haberinde.
O, İndistanda yapqan telükesizlik ve siyaset tefsirlerini «tüşüncesiz» dep adlandırdı.
Arbiy deñiz quvetleriniñ yañı komandanı saylanğanına qadar onıñ vazifelerini Şenbahnıñ muavini kontr-admiral Yan Kristian Kaak yapacaq.
Almaniya arbiy deñiz quvetleriniñ komandanı admiral muavini Kay-Ahim ŞenbahUkraina Rusiye ilhaq etken Qırımnı bir vaqıt qaytaramaz ve onı Gürcistannen beraber NATOğa qabul etmemek kerek, dep bildirdi.
Ukraina Tış işler nazirligi Azatlıq Radiosına bergen tefsirinde Almaniya Arbiy deñiz quvetleriniñ komandanı aytqanlarını qabul etilmez dep adlandırdı.
Şenbahnıñ aytqanları sebebinden Ukraina Tış işler nazirligi Almaniya Federativ Cumhuriyetiniñ Ukraina elçisi Anka Feldguzennı çağırdı.
Almaniya Ukraina sıñırında Rusiye ordularınıñ toplanmasınen bağlı vaziyetni diplomatik ğayretlernen al etmege çağıra. Almaniya Tış işler naziri Annalena Berbok yanvarniñ 17-nde Ukraina ziyareti vaqtında çıqışta bulunıp, memleketniñ Ukrainağa silâ berüv redini tekrarladı. O, «tarihiy mesüliyetke» ve Almaniya koalitsiya ükümetiniñ buhranlı alanlarğa bir de bir silâ alıp ketmemek qararına esaslandı.
