Almaniya arbiy deñiz quvetleriniñ komandanı admiral muavini Kay-Ahim Şenbah, Ukraina Rusiye ilhaq etken Qırımnı bir vaqıt qaytaramaz ve onı Gürcistannen beraber NATOğa qabul etmemek kerek, dep bildirdi. «Yevropeyska pravda» haber etkenine köre, bu aqta Şenbah Manohar Parrikar İndistan mudafaa tedqiqatları institutınıñ konferentsiyasında ayttı.
«Qırım «ketti» ve bir vaqıt qaytmaycaq, bu bir fakt. Duyğularğa degil, faktik vaziyetke esaslanmalımız», – dep bildirdi admiral muavini.
Ukraina Tış işler nazirligi Azatlıq Radiosına bergen tefsirinde Almaniya Arbiy deñiz quvetleriniñ komandanı aytqanlarını qabul etilmez dep adlandırdı.
«Qırım yarımadası yalıñız Almaniya admiral muavininiñ közünde coyula bile. Qırım Ukrainanıñ ve tecavuzcı devletke qarşı qararlı olğanını kösterecek ortaqlarınıñ qattı ğayretleri sayesinde mıtlaqa qaytacaq», – dep aytıla Ukraina tış işler nazirliginiñ spikeri Oleg Nikolenkonıñ tefsirinde.
Ukraina Tış işler nazirliginiñ spikeri Almaniya Arbiy deñiz quvetleri komandanınıñ Rusiye ile dialognı qurmaq kerek fikrini tenqit etti.
«Almaniya Arbiy deñiz quvetleri komandanınıñ Putinni añlamaq ıntıluvınıñ bile ahlâqiy, siyasiy sıñırları olmalı. Bu sefer sıñırlar sert bir şekilde bozuldı. Almaniya Arbiy deñiz quvetleri komandanınıñ laflarınıñ Almaniya ükümeti tarafından açıq red etilmesini talap etemiz», – dep qoştı Nikolenko.
Almaniya Ukraina sıñırında Rusiye ordularınıñ toplanmasınen bağlı vaziyetni diplomatik ğayretlernen al etmege çağıra. Almaniya Tış işler naziri Annalena Berbok yanvarniñ 17-nde Ukraina ziyareti vaqtında çıqışta bulunıp, memleketniñ Ukrainağa silâ berüv redini tekrarladı. O, «tarihiy mesüliyetke» ve Almaniya koalitsiya ükümetiniñ buhranlı alanlarğa bir de bir silâ alıp ketmemek qararına esaslandı.
