Almaniya arbiy deñiz quvetleriniñ komandanı admiral muavini Kay-Ahim Şenbah Twitterde Qırım ve Ukraina aqqında beyanatları devletniñ resmiy noqta-i nazarı degil, onıñ şahsiy fikri ola, dep yazdı.
«İndistandaki analitik merkezde telükesizlik siyasetinen bağlı beyanatlarım al-azırdaki vaziyetke dair şahsiy fikrim ola. Olar (beyanatlar – QA) Almaniya Mudafaa nazirliginiñ resmiy fikrine uymay», – dep yazdı Şenbah.
O, «vaziyetke diqqatsız, yañlış qıymet keskenini, bunı yapmağa kerekmey edi. Yoroycaq şey yoq, bu bir hata edi», dep qoştı.
Almaniya arbiy deñiz quvetleriniñ komandanı admiral muavini Kay-Ahim Şenbah Ukraina Rusiye ilhaq etken Qırımnı bir vaqıt qaytaramaz ve onı Gürcistannen beraber NATOğa qabul etmemek kerek, dep bildirdi.
Ukraina Tış işler nazirligi Azatlıq Radiosına bergen tefsirinde Almaniya Arbiy deñiz quvetleriniñ komandanı aytqanlarını qabul etilmez dep adlandırdı.
Şenbahnıñ aytqanları sebebinden Ukraina Tış işler nazirligi Almaniya Federativ Cumhuriyetiniñ Ukraina elçisi Anka Feldguzennı çağırdı.
Almaniya Ukraina sıñırında Rusiye ordularınıñ toplanmasınen bağlı vaziyetni diplomatik ğayretlernen al etmege çağıra. Almaniya Tış işler naziri Annalena Berbok yanvarniñ 17-nde Ukraina ziyareti vaqtında çıqışta bulunıp, memleketniñ Ukrainağa silâ berüv redini tekrarladı. O, «tarihiy mesüliyetke» ve Almaniya koalitsiya ükümetiniñ buhranlı alanlarğa bir de bir silâ alıp ketmemek qararına esaslandı.
