Kyivge ziyareti zamanı Almaniya kantsleri Angela Merkel ve Ukraina prezidenti Volodımır Zelenskıy «Şimaliy aqım-2» leyhası ile bağlı kefaletlerni, telükesizlik vaziyetini, eki taraflı munasebetlerni ve «Qırım platforması» sammitinde iştirak etip olacağı olamaycağını muzakere etecekler. Bunı avgustnıñ 11-nde brifing vaqtında prezident spikeri Sergiy Nikiforov bildirdi.
Onıñ malümatına köre, Ukraina Almaniya kantslerine «Qırım platformasını» ziyaret etmege teklif etecek, «razı olacaqmı olmaycaqmı» ise yaqında belli olacaq.
«Angela Merkel ve Volodımır Zelenskıy «Şimaliy aqım-2» leyhasınıñ areketke ketirilüvinden soñ Rusiyeniñ öz inhisar aqqını qullanmağa tırışqan taqdirde Almaniya özüne alğan mecburiyetlerniñ yerine ketirilüvini nasıl kefalet etecigi aqqında laf etecekler. Mıtlaqa Ukrainanıñ şarqındaki telükesizlik vaziyeti ve bizim ortaqımız olğan Almanâi ile eki taraflı munasebetleri muzakere etedecekler», – dedi Nikiforov.
Prezident temsilcisi Merkelniñ ziyareti «Ukraina aqqında Ukrainasız bir söz bile aytılmağanını» isbatlağanını bildirdi.
Avgustnıñ 9-nda Ukraina prezidenti Volodımır Zelenskıynıñ matbuat kâtibi Sergey Nikiforov Almaniya kantsleri Angela Merkel mezkür sammit arfesinde, avgustnıñ 22-nde Kyivge kelecek, dep ayttı.
Ukraina TİN malümatına köre, endi 38 memleket «Qırım platforması» sammitinde iştiragini tasdıqlağan.
Dmıtro Kulebanıñ bildirgenine köre, «Qırım platforması»nıñ sammitinde böyle paneller olacaq:
- Qırımnı ilhaq etme ıntıluvnıñ tanımamazlığı aqqında;
- Azaq-Qara deñiz bölgesiniñ arbiyleştirilüvi aqqında;
- insan aqları ve turğun inkişaf yolunen Qırımnıñ reintegratsiya yolları aqqında;
- qırımtatar halqınıñ aqlarınıñ tiklenilmesi aqqında.
Onıñ qayd etkenine köre, temsilcileri Kyivge kelip olamaycaq devletler Sammitte qabul etilecek beyannamege qoşula bilecek.
«Qırım platforması» sammitini qırımtatar asıllı ukrain yırcısı Jamala «1944» yırınen açacaq. Bu aqta UNN neşiri Ukraina Tış işler naziriniñ birinci muavini Emine Cepparnıñ malümatına esaslanıphaber ete.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
