Qırımtatar rejissörı Nariman Aliyev, qırımtatar halqınıñ lideri Mustafa Cemilevniñ Nobel sulh mukâfatına namzeti etip kösterilmesi dünyağa işğal etilgen Qırım ve bugünde qırımtatarlarnıñ evlerinde keçirilgen tintüvler aqqında aytıp bermege yardım eter, dep bildirdi. Bunıñ aqqında o Qırım.Aqiqatqa ayttı.
"Mında eñ müimi mukâfat degil, daa keñiş auditoriyağa Qırım, Ukrainadaki bar olğan ve biz rastkelgenimiz qıyınlıqlar aqqında aytıp bermek imkândır", - dedi o.
Onıñ sözlerine köre, Mustafa Cemilev "Nobel sulh mukâfatı sayesinde Qırımnı ve Ukrainanı keñiş auditoriyağa taqdim etip olur".
"Cemilev Ukraina nedir, Qırım nedir, qırımtatarlar kimdir, ne oğrunda küreşkenimiz aqqında adekvat şekilde aytıp bere", - dep qayd etti Aliyev.
Poloniya seymi qırımtatar halqınıñ lideri, Ukraina halq deputatı Mustafa Cemilevni 2022 senesi Nobel Barışıq Mukâfatına namzet kösterdi.
Poloniya aq qorçalayıcı Petr Hleboviç «Qırım haber agentligine» bildirgenine köre, Cemilev Seymniñ spiker muavini Malgojata Gosevskaya tarafından namzet kösterildi.
Mustafa Cemilev Nobel Barışıq Mukâfatına bundan evel de namzet kösterilgen edi.
Rusiye işğal etken Qırımda Mustafa Cemilevniñ mahkeme esnası devam ete.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi.
Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
