Rusiyeniñ Sekizinci temyiz mahkemesi "qırımlı musulmanlar davasınıñ" soqur mabüsi Aleksandr Sizikovnıñ advokatınıñ qırımlını apiske qaytarmağa qarar bergen mahkemeniñ qararına qarşı temyiz talabını baqmağa razı olmadı.
Bu aqta "Qırım birdemligi" cemaat birleşmesiniñ haberinde aytıla.
Advokat istinaf mahkemesiniñ qararını şikâyet etti. Onıñ qayd etkenine köre, razı degil ve onı qanunsız dep saya. İmayeci Sizikov başqasınıñ yardımı olmasa yaşamaz ve birinci mahkeme "keregi kibi tedqiq yapıp, sağlığına doğru qıymet kesti", dep qayd etti.
"Mahkeme Sizikovnıñ hastalığı ileriley, qoşma hastalıqları bar ve kerekli tedaviylev ve baquv olmasa, ölümge qadar menfiy aqibetleri ola bile, çünki Sizikov programmağa köre reabilitatsiyadan keçmeli, azatlıqtan marum etilgende ise bunı yapmaq imkânsız", – dep qayd etti Sizikovnıñ advokatı.
Bundan ğayrı, imayeci er adamnıñ hastalığı "ağır, cezasına çekmesine mania ola, Rusiye Federatsiyası Ceza kodeksiniñ 43-ünci maddesine köre ceza maqsadlarına irişmesine yol bermey ve [Sizikovnıñ] tüzetüv müessisesinde bulunmasını Rusiye Federatsiyası Ceza kodeksiniñ 7-nci maddesine uyğun gumanizm printsiplerine zıt ete", dep israr etti. Advokatnıñ qayd etkenine köre, müvekkiliniñ menfaatları içün BM İnsan aqları komitetine muracaat yollandı ve istinaf qararınıñ lâğu etilmesi talap etildi.
Amma qadı Oksana Lazareva advokatnıñ şikâyetini baqmaq içün bir sebep "yoq", dep qarar çıqardı. Bu yıl yanvarniñ 16-nda red qararını aldı.
Qadı Rusiye Federatsiyası Cinaiy protsessual kodeksiniñ 401.15 maddesiniñ 1-inci qısmına esaslanıp, temyiz mahkemesindde qararnıñ lâğu etilmesi içün "dava ketişatına tesir etken cinaiy ve (ya da) cinaiy-protsessual qanunnıñ bozuvları" sebep ola, dep qarar çıqardı.
Soñra qadı Rusiyeniñ Cezalarnı yerine ketirüv federal hızmetiniñ 2025 senesi martnıñ 21-nde №42 tibbiy bölükniñ ekim komissiyasınıñ qararına esaslandı. O, Sizikovnıñ hastalığı — soqurlıq — ceza çekmesine mania olğan hastalıqlar cedvelinde olsa da, ve «cinayet yapmazdan evel bar edi», «hastalıq ilerilegenine ve ayatı içün telükeli olğanına dair malümat yoq», dep qayd etti.
Onıñ qayd etkenine köre, Sizikov «umumiy şartlarda» tüzetüv koloniyasında tutulamaz. Amma «hastalığına uyğun şaraitlerde bulunması» mümkün olğanını red etmey.
Oktâbrniñ 21-nde Rusiyedeki Krasnoyarsk ülke mahkemesi Aleksandr Sizikovnıñ azat etilmesinen bağlı qararnı lâğu etip, onı Qırımdaki evinden apishanege qaytarmağa qarar çıqardı.
Oktâbrniñ 22-nde Qırımnıñ Bağçasaray rakonında aqşam Rusiye uquq qoruyıcıları “qırımlı musulmanlar davasınıñ” soqur mabüsi Aleksandr Sizikovnıñ evinde tintüv keçirip, onı alıp ketti.
Oktâbrniñ 23-nde Rusiye kontrolindeki Qırımnıñ Bağçasaray rayon mahkemesi Aleksandr Sizikovnı “poliske riayet etmeme” memuriy maddesine istinaden (Rusiye Federatsiyası Memuriy uquq bozuvları kodeksiniñ 19.3 maddesiniñ 1-inci qısmı) 10 künge apiske aldı.
Bu yıl mayısta Krasnoyarsk ülkesiniñ Minusinsk şeer mahkemesi Sizikovnı soqur olğanından azat etti, o, Qırımğa qayttı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan "Hizb ut-Tahrir" diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.