"Qırımlı musulmanlar davasınıñ" soqur mabüsi Aleksandr Sizikovnıñ anası Yelena bildirgenine köre, rusiyeliler oğlunı Yekaterinburgden tranzitnen alıp kete ve fevralniñ ortasına qadar Minusinsk apishanesine etap etmege planlaştıralar – Qırımdan 5 biñ kilometrden ziyade. Bu aqta "Suspilne Krım" haber ete.
"Keçken cumaertesi künü onı Yekaterinburgğa alıp kettiler. Yatqan apishanege, Minusinskke, alıp keteler. Onı anda fevralniñ ortasına qadar ketirmek kerekler. Advokatı böyle ayta. Biz onı Minusinskke qaytarırlar, dep tahmin etken edik. Çünki olar insanlarnı daa evel yatqan apishanelerge qaytaralar. Saşanı Aqmescit SİZOsından dekabrniñ 1-nde etapqa çıqardılar", – dep añlattı qadın.
Onıñ tarif etkenine köre, oğlunıñ sağlıq vaziyeti ve olmağan bağ onı raatsızlay.
"Aqmescitte men onı körip oldım. Bu etap oğlum içün pek qıyın, bunı bilem, etapta yanında kimse yoq. Tek mabüsler yardım ete. Saşa Krasnodarda ve Volgogradda tranzitnen oldı. Andan bir-eki kere qısqa-qısqa laf ettik. Amma şimdi bir bağımız yoq. Bir haber bekleyim, belki, bir mektüp ya da kâğıtçıq. Sağlığı nasıl bilmeyim, bulunğan şaraitlerini bilmeyim. Ne aqça, ne urba, ne ilâc yollap olam", – dep añlata siyasiy mabüsniñ anası.
Onıñ aytqanına köre, Sizikovnıñ advokatı onı apishanege qaytarmaq qararına qarşı temyiz şikâyetini berdi, amma Rusiye tarafınıñ cevabı ne vaqıt olur bilmey.
"Apishane yolbaşçısı haber bermek kerek, amma resmiy mektüp eki ayğa qadar kele bile. Keçken sefer, onı Krasnodardan çıqarğanlarında, apishane yolbaşçısından bir aftadan soñ Saşanı alıp ketken apishanenen bağlı mektübi keldi. Şimdi qayda olğanını ve ne alda olğanını haber etmediler. Advokat Krasnoyarsk ülke mahkemesiniñ Minusinskniiñ Aleksandrnı azat etmek qararını lâğu etip, onı apishanege qaytarmağa qarar çıqardı. Amma şimdi bayramlar – cevap ne vaqıt olur bilmeymiz", – dep qoştı qadın.
Noyabrniñ başında belli olğanına köre, "qırımlı musulmanlar davasınıñ" soqur mabüsi Aleksandr Sizikov Aqmescitniñ SİZO-1-nde tutula ve Rusiye koloniyasına etap etilecek.
"Podderjka Aleksandra Sizikova" ("Aleksandr Sizikovğa qoltutuv") Telegram kanalı anası Yelena Sizikovanıñ malümatına esaslanıp haber etkenine köre, Aleksandr Bağçasaraydaki vaqtınca tutuv izolâtorından Aqmescit SİZOsına avuştırıldı. Onıñ aytqanına köre, o, anasınen bağlanıp, oktâbrniñ 31-nde onı köz ekimi ve nevrologğa alıp kettiler, dep bildirdi. Ekimler Sizikov "SİZOda qala bile", dep bildirdi, polis hadimlerine mahkeme içün bergen saqatlıq vesiqasınıñ kopiyasını aldılar. Bundan evel advokat Emil Kurbedinov Qırım Yuqarı mahkemesiniñ qararından soñ Sizikovnıñ bulunğan yerini tapıp olamağan edi.
Oktâbrniñ 21-nde Rusiyedeki Krasnoyarsk ülke mahkemesi Aleksandr Sizikovnıñ azat etilmesinen bağlı qararnı lâğu etip, onı Qırımdaki evinden apishanege qaytarmağa qarar çıqardı.
Oktâbrniñ 22-nde Qırımnıñ Bağçasaray rakonında aqşam Rusiye uquq qoruyıcıları “qırımlı musulmanlar davasınıñ” soqur mabüsi Aleksandr Sizikovnıñ evinde tintüv keçirip, onı alıp ketti.
Oktâbrniñ 23-nde Rusiye kontrolindeki Qırımnıñ Bağçasaray rayon mahkemesi Aleksandr Sizikovnı “poliske riayet etmeme” memuriy maddesine istinaden (Rusiye Federatsiyası Memuriy uquq bozuvları kodeksiniñ 19.3 maddesiniñ 1-inci qısmı) 10 künge apiske aldı.
Bu yıl mayısta Krasnoyarsk ülkesiniñ Minusinsk şeer mahkemesi Sizikovnı soqur olğanından azat etti, o, Qırımğa qayttı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan "Hizb ut-Tahrir" diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
