Suv basqan Yalta iyünniñ 19-nda aqşamğa yaqın suvnen temin etilip başlanacaq. Bunı Facebook saifesinde Qırımnıñ Rusiye başı Sergey Aksönov haber etti.
«Yaltada iş ziyaretinen bulunam. Al-azırda şeer suvnen temin etilmey. Suv ketirile. Tahminlerge köre, Yaltada bugün aqşamğa yaqın suv endi olacaq», – dep yazıla bildirmede.
Hatırlatamız, evel Yaltanıñ başlıqları şeerde suv teminatını kesmege qarar alğan edi.
Yaltada tufan neticesinde 18 insan yararalandı, 1 erkek öldi ve 1 qadın bellisiz ğayıp oldı. Bu malümatnı iyünniñ 19-nda saba saat 6-da Qırım boyunca Rusiye Fevqulâde vaziyetler nazirligi haber etti.
Yaltada tufan: Qırımnıñ cenübiy yalısınıñ paytahtında ne olayata (fotoresimler)
İyünniñ 18-ne keçken gece, bol yağğan yağmurlar neticesinde Büyük Yaltanı suv bastı, şeerde cayav keçitleri suv astında qaldı. Yerli memurlar cemaat naqliyatınıñ qatnamasını toqtattı. Yaltada fevqulâde vaziyet ilân etildi, şeerge kiriş yeri qapalı.
Sağanaqlardan ve şeerniñ suv basqan soñ 80 transformator stantsiyası ve eki elektrik naqil hattısı elektriksiz qaldı. Krımenergonıñ haber etkenine köre, episi olıp 2700 istimalcı ışıqsız qalğan. Bundan ğayrı yerli memurlar bölgede suvnıñ kesilmesi aqqında qarar aldı ve şeer sakinlerini suv alıp qoymağa çağırdı.