Qırımda yañı kurort şeeri Saq rayonında qurulacaq, dep bildirdi sentâbrniñ 14-nde jurnalistlerge Qırımnıñ Rusiye yolbaşçısı Sergey Aksenov.
«Ğarbiy yalı boyu, anda tahminen 50 biñ sakin yaşaycaq meskün yerni qurmağa azırlar. Kurort mevsiminde yaşamaq ve raatlanmaq içün. Mence, ğaye doğru, qoltutamız. Şimdi esaplar yapıla. Bu Ğarbiy Qırım, Saq rayonı, büyük boş meydanlar. Er şey diqqat celp etecek», – dep bildire Aksenovnıñ aytqanlarını akimiyetke qoltutqan «Krıminform» saytı.
Onıñ malümatına köre, yañı şeerde oda sayısı 10 biñden çoq olacaq. Aksenov, yañı meskün yerge suv ve elektrik energiyası yeter, dep işandırdı.
Keçken afta Qırımnıñ Rusiye ükümetiniñ baş nazir muavini Yevgeniy Kabanov yarımadada «yañı şeer peyda olacaq», dep ilân etti.
O, yañı şeer qayda olacaq, adı ne olacaq aytmadı, amma ğarbiy tarafta olacaq, dep bildirdi.
