Rusiye kontrolindeki Qırım yolbaşçısı Sergey Aksenovnıñ bildirgenine köre, saibi Oleg Zubkov apiste yatqan Qarasuvbazar rayonındaki «Taygan» arslanlar parkı işine yañıdan başlaycaq. Bu aqta Aksenov fevralniñ 11-nde jurnalistlerge ayttı, dep bildire Qırım kütleviy haber vastaları.
«Ne içün çalışmaycaq eken? Olar yol haritasını imzalağanlar, Zubkov Oleg Alekseyeviç. Olğan areket planları iqtisadiy inkişaf nazirliginen keliştirilgen edi – yani, er kes yerine ketirmege azır. Şunıñ içün bir problem körmeyim: añlaştıq, olar bütün yañlışlarnı tüzete ve çalışmağa başlay», – dedi Aksenov.
«Taygannıñ» matbuat kâtibi Tatyana Aleksaginanıñ bildirgenine köre, arslanlar parkı artıq tevqif altında degil, amma qapalı qala.
2019 senesi dekabrniñ 5-nde ayında Rusiye kontrolindeki Qarasuvbazar rayon mahkemesi «Taygan» arslanlar parkınıñ faaliyetini toqtattı. Rusiye mahkeme vekilleri Qırımda parklarnı müürledi, dep bildirdi Zubkov Qırım.Aqiqatqa. İş adamınıñ malümatına köre, par qapatılğan soñ zarar miqdarı 10 million rubleden çoq oldı.
Bundan ğayrı, Rusiyeniñ Kaluga şeerindeki Merkeziy okrugnıñ Akemlik mahkemesi evelki instantsiyanıñ «Taygan» arslanlar parkınıñ reklamasını alıp taşlamaq qararını tasdıqladı.
Hatırlatamız, işğal etilgen Qırımnıñ sakinleri apiske alınğan «Taygan» arslanlar parkı ve «Skazka» ayvanat bağçasınıñ saibi Oleg Zubkovğa qoltutıp, fevralniñ 11-nde Aqmescit mahkemesiniñ binasına kelmege çağıra. Anda apiske alınmasınıñ istinafı baqılacaq oturışuv ötkerilecek.
Aqmescitte fevralniñ 7-nde apiske alınğan Zubkov tutulğan SİZO binası ögünde oña qoltutuv bir kişilik narazılıqları olıp keçti.
Fevralniñ 3-nde Rusiye kontrolindeki Qarasuvbazar rayon mahkemesi «Taygan» parkında tişlengen turist Olga Solominanıñ davası boyunca qırımlı iş adamı Oleg Zubkovnı apiske aldı.
Advokat Arman Petrosân Zubkovnıñ ketmeme seneti yerine eki ay apis müddetiniñ belgilenmesini «qanunsız» dep adlandırdı. İmaye mahkemeniñ tevqif qararını şikâyet etecek ola.
2014 senesi Rusiyeniñ yarımada ilhaqına qoltutqan qırımlı iş adamı Oleg Zubkovnıñ Qırımnıñ Rusiye akimiyetinen zıddiyeti bar. Oleg Zubkov, mal-mülki bulunğan topraq damartılarınıñ vesiqalarını beş yıldan berli resmiyleştirip olamay, dep bildire.
Qırım işğali devamında Zubkov Kreml kontrolindeki Qırım akimiyeti tarafından oña nisbeten para cezaları ve qabaatlavlarnen bağlı tahminen 500 mahkeme oturışuvına bardı.
