Rusiye kontrolindeki Qırım yolbaşçısı Sergey Aksenov, işğal altındaki yarımadada koronavirus sebebinden vaziyet kerginleşse, komendant saatını ilân etecek, dep bildirdi. Bu aqta o, aprelniñ 8-nde Qırımdaki koronavirus yuqunçınıñ tarqaluvına qarşı tedbirler operativ ştabınıñ toplaşuvında ayttı.
«Vatandaşlarnıñ raat olğanını köremiz. Özüñiz de köresiñiz, Aqmescitte ve diger şeerlerde maşina areketi toqtamay. Qırımlılardan rica etem. Vaziyetniñ ne qadar ciddiy olğanını añlamaysıñız… Vaziyet daa beter olacaq, komendant saatı olacaq – kimse bir yerge çıqıp olamaz», – dedi o.
Hatırlatamız, Aprelniñ 8-nde Yaponiyadan qaytqan qırımlınıñ koronavirusı qayd etildi.
Aprelniñ 7-nde Aksenov yañı hastalar qayd etilse, koronavirus tarqaluvına yol bermemek içün sıñırlav tedbirlerini sertleştirecek, dep qorquzdı.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 12-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
