Rusiye kontrolindeki Qırım yolbaşçısı Sergey Aksenov, yañı hastalar qayd etilse, koronavirusnıñ tarqaluvına yol bermemek içün sıñırlav tedbirleri sertleştirilecek, dep bildirdi.
Bu aqta o, aprelniñ 7-nde koronavirus yuqunçınıñ tarqaluvına qarşı tedbirler operativ ştabınıñ toplaşuvında ayttı.
«Körem ki, maşinalarnıñ sayısı tez arttı. Bu daa bir tarqaluvğa qadar ya da bir yerde merkez olur. Er şeyni qapatmağa mecbur olacaqmız ve (qomşu Rusiyedeki – QA) Krasnodar ülkesinden daa küçlü bir rejim olacaq. Tenbileyim. Tertipsizlik başqalarnı telükege oğrata. Diqqatlı olmañıznı rica etem», – dedi Aksenov.
Qırımnıñ Rusiye Sağlıq nazirliginiñ malümatına köre, aprelniñ 7-nde Qırımda koronavirus sebebinden 2900 insan tibbiy közetüv altında buluna. Qırımnıñ Rusiye yolbaşçısı Sergey Aksenov aprelniñ 7-nde yañı koronavirus hastası aqqında haber etti.
Aqyarnıñ Rusiye akimiyeti, şeerde yañı hastalar yoq, amma 1340 insan yaşağan yerinde közetüv altında buluna, dep bildirdi.
Aprelniñ 6-nda qayd etilgen yañı koronavirus hastası aqqında haber etildi, aman-aman üç biñ insan tibbiy közetüv altında buluna, beş kişi hastahaneden çıqarıldı.
Koronavirus yuqunçınıñ tarqaluvına yol bermemek içün işğal etilgen Qırımda ve Aqyarda «yüksek seviyeli azırlıq» rejimi kirsetildi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 12-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
