Rusiyeniñ nezaretinde olğan Qırımnıñ başı Sergey Aksönov, Qırımnıñ suv meselesiniñ al etilmesinde 2021 «deñişüv yılı» olacaq, dep bildirdi.
«Bu yıl yarımadanıñ suv meselesiniñ al etilmesinde 2021 deñişüv yılı olmaq kerek. Prezidentimizniñ avalesinen yarımadanıñ suvnen temin etilmesi ile bağlı azırlanğan Rusiye ükümetiniñ kompleks planı amelge keçirile. Eminim ki, bu qıyınlıqlarnı aşacaqmız», – dep yazdı Aksönov Qırımnıñ Rusiye tarafından işğal etilmyesiniñ yedinci yıldönümine.
Rusiye ükümetiniñ matbuat hızmetiniñ bildirgenine köre, Qırım ve Aqyarnıñ suv meselesini al etmek ve eyilleştirmek içün Rusiye bücetinden 3,2 milliard ruble ayırılacaq.
Leonid Kravçuk, Qırımda suv qıtlığı meselesi daa da kerginleşecegine emin ve bu Rusiyeniñ Ukrainağa qarşı tecavuzınıñ artmasınıñ sebebi ola bile.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
