Rusiye nezaretindeki Qırım başı Sergey Aksönov, mekteplerniñ etrafında iç bir qora ve qaravullar terrorcılardan 100%-ğa saqlap olamaz, dep ayttı.
Böyle etip o, Keriç faciasınıñ yıldönümini tefsir etti.
"Ebet, iç bir qora, iç bir qaravullar, iç bir tehnika ya da psihologiya vastaları 100% terrorcılardan saqlap olamaz. Dünyada kimse ve bir yerde böyle kefalet berip olamaz. Menimce, birinciden terbiyelev, maneviy ve ahlâqiy terbiye, vatanperverlik terbiyesi müim", - dep yaza Aksönovnıñ sözlerinden Qırım ükümetiniñ matbuat hızmeti.
Aynı vaqıtta o, yarımada tasil müissiselerinde qoruvnı temin etmek içün qoşma tebdirlerniñ kerekligini qayd etti.
"Bütün müessiselerni Rosgvardiya qaravullamaq kerek. Rusiye akimiyetine böyle muracaatnı yolladıq. Müsbet cevapqa ümütlimiz", - qoştı Aksönov.
Bundan evel Qırımnıñ rusiyeli Tasil Nazirliginiñ başı Natalya Gonçarova, ilhaq etilgen Qırımnıñ mektepleriniñ çoqusında şimdilik ihtisaslı qaravul qoruması yoq, dep bildirdi.
Cumaaqşamı künü, oktâbr 17-sinde Keriç politehnika kolleciniñ faciasınıñ yıldönüminde Keriçte matem künü ilân eildi.
Oktâbrniñ 17-nde, Keriç politehnik köllecinde patlav ve atışuv oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
