Rusiye Devler duması qabul etken akimiyet organları, devlet timsalleri ve cemiyetke nisbeten ürmetsiz ifadeler içün ve “yalan” haberlerniñ tarqatılması içün mesüliyet aqqında qanun leyhası, qırımlılarnı yañı taqibatlarğa oğrata bile. Bu aqta Qırım uquq qoruyıcı gruppası bildire.
Uquq qoruyıcılarnın fikrince, “bu qanunlarnıñ kesen-kes ifadeleri yoq, bunıñ içün küç organlarınıñ hadimleri olarnı keñ qullana bile, böylece matbuatqa da basqı yapa bile”.
“Bu qanun, işğal rejimini tenqit etken Qırımdaki serbest faalciler, jurnalistler ve blogerlerni taqip etmege imkân yarata”, - dep tüşüne uquq qoruyıcılar.
Olar qayd etti ki, ukrain matbuatı derc etken Qırım aqqında haberlerniñ çoquşına Rusiye akimiyeti “yalan haberler” dey.
Qanunğa köre, böyle yazı-maqalelernen paylaşuv içün 30 buñden 500 biñge qadar para cezası üküm etile bile.
Rusiye Devlet Duması, akimiyet organları, devlet timsalleri ve cemiyetke nisbeten ürmetsiz ifadeler içün ve “yalan” haberlerniñ tarqatılması içün mesüliyet aqqında qanun leyhasını soñki üçünci muzakeresinden soñ qabul etti.
