Rusiye Devlet Duması, akimiyet organları, devlet timsalleri ve cemiyetke nisbeten ürmetsiz ifadeler içün ve “yalan” haberlerniñ tarqatılması içün mesüliyet aqqında qanun leyhasını soñki üçünci muzakeresinden soñ qabul etti. Bu aqta Azatlıq Radiosınıñ rus bölügi haber ete.
İşbu qanun leyhalarını Devlet dumasına Rusiye Federatsiya Şurasınıñ qanunlar komitetiniñ reisi Andrey Klişas, mebusler Lüdmila Bokova ve Dmitriy Vâtkin tarafından kirsetilgen edi. Qanun metnine köre, ceza berilecek malümat sayğısızlıq ifadelemeknen beraber «insan itibarını ve cemaat ahlâqını aqaretlemeli».
Olar akimiyetni ve devlet timsallerini aqaretlegen vatandaşlarnı 5 biñ ruble para cezasına ve 15 kün memuriy apis cezasına üküm etmege teklif etken ediler. «Yañlış» malümat paylaşqan vatandaşlarnı 100 biñ ruble, memurlarnı 200 biñ rublege qadar, şirketlerni ise yarım million rublege qadar para cezalarına üküm etmege teklif etile. Tekrar bozuv ya da yaşav destegi, sanayı ya da banklarnıñ işine keder etken «yañlış» malümat paylaşuvı içün şirketlerge berilecek para cezası bir buçuq million rublege qadar yete bile.
