Advokatlarnıñ Aqmescit SİZO-sına qabulı er vaqıttaki kibi kerçekleştirile. Bunı Qırım.Aqiqatqa, iyülniñ 14-nde müşterisi, devlet hainliginen qabaatalnğan ve mahküm etilgen Qırım sakini İvan Yatskinni yoqlağan advokat Nikolay Polozov bildirdi.
Advokat SİZO-nıñ iş cedveliniñ yalıñız izolâtornıñ vazifeli şahısları tarafından vatandaşlarnıñ şahsiy meseleleri ile qabulı ceetinden denişkenini añlattı.
«Bu yalıñız şahsiy qabulğa aittir. Bir ariza yazmaq, hususiy bir şahısqa şikâyet etmek kerek olsa, böyle qabul kerçekleştirilmey. Advokatlarnıñ ve tahqiqatçılarnıñ qabulı er vaqıttaki kibi kerçekleştirile. Yekâne sıñırlav – şimdi maskadan ğayrı daa tibbiyet qolçaqlar olmalı», – dedi Polozov.
Advokatnıñ sözlerine köre, COVID-19 hastaları qalğanlardan tecrit etilip, karantin kameralarına keçirilgen. Aqmescit SİZO-da koronaviruqa oğrağanlarnıñ tam sayısı belli degil.
Evel, Qırımdaki yekâne tahqiqat tevqifhanesi, Moskvanıñ nezaretinde olğan Aqmescit SİZO-sına COVID-19-nıñ tez tarqalması sebebinden karantin qoydılar, dep haber etilgen edi.
Hatırlatamız, Qırımda iyülniñ 13-nde 375 koronavirus hastası qayd etildi.
Qırımda soñki afta COVID-19 hastalarınıñ sayısı 28% arttı, dep bildirdi Qırımdaki Rospotrebnadzor yolbaşçısı Natalya Penkovskaya.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
