Qırımdaki yekâne tahqiqat tevqifhanesi, Moskvanıñ nezaretinde olğan Aqmescit SİZO-sına COVID-19-nıñ tez tarqalması sebebinden karantin qoydılar. Hadimleri onı yuqunçsızlaştıralar.
Bunıñ aqqında «Qırım birdemligi» cemaat birleşmesi, işğal etilgen Qırımda insan aqlarınıñ mudfaasından Rusiye cemaat nezaret komissiyasınıñ azası Andrey Kozarge atfı etip bildirdi.
«Müdiriyet yuqunç SİZO territoriyasına nasıl keçkenini teşkere. Qaç insan koronavirusqa oğrağanı aqqında belli denil. Olardan qaç tevqifli ve qaç hadim olğanı da belli degil. Hastalanğanlarnı SİZO-nıñ tibbiyet bölügüne keçirgenler», – dep yazıla malümatta.
Kozarniñ aytqanına köre, adamlar hastalıqnı yengil keçire ekenler, ilâclar ise yetmey.
Şmdilik bu malümatnı tasdıqlağan liger malümat yoq.
Hatırlatamız, Qırımda iyülniñ 10-nda 371 koronavirus hastası qayd etildi.
Qırımda soñki afta COVID-19 hastalarınıñ sayısı 28% arttı, dep bildirdi Qırımdaki Rospotrebnadzor yolbaşçısı Natalya Penkovskaya.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
