Advokat Emil Kurbedinov advokatlarnıñ tintüvler keçken qırımtatarlarnıñ evlerine yiberilmemesini qanunsız saya. O, onı da müşterisiniñ evine yibermegenlerini haber etti.
"Açıq-aydın bir cevap alâ daa yoq, meni tintüvge yibermeyler. Men, elbette ki, bunı tintüv keçirgenlerniñ qanunsız ve temelsiz qararı dep sayam. Aynı vaqıtta mında kelgen adamlarnıñ operativ video çeküvi yapıla. Men, bunı protokolda qayd etmelerini hatırlattım, çünki bazıda bunı qayd etmeyler ve soñra operativ videolarnı - qanunnı bozaraq - matbuatta derc eteler", - dedi Kurbedinov.
Bundan evel advokat Edem Semedlâyev Bağçasarayğa keldi, anda sabadan berli qırımtatarlarnıñ evlerinde tintüvler yapıla. Onı müşterisi Seytumer Seytumerovğa yibermeyler.
Martnıñ 11-inde saba Rusiye quvetçileri Bağçasarayda ve Bağçasaray rayonında qırımtatarlarnıñ evlerinde tintüv keçire. Faallerniñ malümatına köre, umumen altı-yedi ev tintile. Hususan, tarihçı Seitumer Seytumerov, Şükri Seytumerovnıñ, "Qırım birdemligi"niñ streamerleri Amet Süleymanov ve Seydamet Mustafayevnıñ, Rustem Seytmemetov ve Ayder Süleymanovnıñ evlerinde.
Şimdilik tintüv sebepleri belli degil. Rusiye quvetçileriniñ resmiy tefsirleri yoq. Qırım.Aqiqat tafsilâtlarnı bilmege tırışa.
