Qırımda tintüvlerden soñ apiske alınğanlarnı qorçalamaq içün taqım qurğan advokatlar Ukrainanıñ Rostov-na-Donu (Rusiye) konsulınıñ yardımı ile tutulğan 23 kişiniñ bulunğan yerini ögrenip oldı.
Bu aqta «Qırım birdemligi» cemaat teşebbüsi qırımlı advokat Edem Semedlâyevniñ malümatına esaslanıp bildire.
«Vaqıt az olğanına baqmadan, martnıñ 27-nde apiske alınğan ve martnıñ 29-nda Rostov-na-Donuğa (Rusiye) çıqarılğan 23 qırımtatarını, qırımlı musulmannı qorçalamaq içün taqım qurdıq. Ukrainanıñ Rostov-na-Donu konsulı ve Rostov vilâyetindeki Cemaat nezaret komissiyasınıñ yardımı ile er biriniñ bulunğan yerini bildik», – dep qayd etti Semedlâyev.
Advokatnıñ aytqanına köre, 24-ünci qırımtatar faali Edem Yayaçikovnıñ bulunğan yeri alâ jaa belli degil, apayı aqayı hırsızlanğanına dair ariza bergen edi.
«Qırım birdemliginiñ» malümatına köre, 2019 senesi martnıñ 27-nde tintüvlerden soñ tutulğan ve daa soñra apiske alınğan qırımtatarlarnıñ davası boyunca advokatlar gruppasınıñ koordinatorı advokat Edem Semedlâyev oldı.
Cemaat birleşmesiniñ qayd etkenine köre, şimdilik Rostov-na-Donu SİZOsında mabüslernen tek qırımlı advokat Lilâ Gemeci körüşip oldı. Qalğan imayeciler müvekkillerinen kelecek afta körüşmege planlaştıra.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde ve 28-nde Aqmescitniñ Kiyev rayon mahkemesi tutulğan faallerniapiske aldı.
Martnıñ 29-nda Rusiye uquq qoruyıcıları Qırımdaki tintüvlerden soñ qıdırılğan qırımtatar faali Edem Yayaçikovnı tutıp aldı.
Aqmescitniñ Bavurçı qasabasında keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Aqmescit mahkemesi Ziyadinovğa «politsiyağa qarşı çıqqanı içün» 500 ruble para cezasını berdi. Mamutov ise 5 künge apiske alındı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqabildirgenine köre, Qırımda tevqif etilgen 23 qırımtatar faalini Rusiyege alıp ketkenler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
