Rusiye Yuqarı mahkemesi istinaf şikâyetini baqqan soñ Aqmescitteki birinci «Hizb ut-Tahrir» gruppasınıñ advokatları halqara qurulışlarğa şikâyetlernen muracaat etmege niyetleneler. Bu aqta advokat Lilâ Gemeci Qırım.Aqiqatqa tarif etti.
«İmaye tarafı, Rostov-na-Donunıñ Şimaliy-Kavkaz okrugınıñ arbiy mahkemesiniñ ükmüni ne içün qanunsız dep sayğanına dair delillerini berdi. Müvekkilerimizniñ cezası yarım yılğa eksiltildi, imaye tarafı bunı büyük bir ğalebe dep saymay. Ükümni alğan soñ advokatlar Avropa insan aqları mahkemesine şikâyet berecekler», – dep tarif etti Gemeci.
Onıñ qayd etkenine köre, şikâyetler BM komitetlerine de berile bile. Anda «biz müvekkilerimizniñ qabaatsız olğanını ve Avropa şartnamesiniñ bir sıra maddesi bozulğanını isbatlamağa devam etecekmiz».
İmayeciniñ bildirgenine köre, Rusiye ve Ukraina arasında mabüslerni deñişim kerçekleşse, «siyasiy taqip meselesi tek vaqtınca çezilecek, amma problemanıñ tamamen çezilecegi yoq».
«Deñişim bu problemanıñ çezilüvi olaraq baqılsa, siyasiy mabüslerniñ tuvğanları içün qorantalar qavuşacaq büyük bir imkân ola bile. Amma, ne yazıq ki, deñişim bütün problemanı tolusınen al etmey. Birileri azat etilse, diger faaller cinaiy taqipke oğraması mümkün», – dep qayd etti Gemeci.
Rusiye Yuqarı mahkemesi dekabrniñ 24-nde istinaf şikâyetini baqıp, «Hizb ut-Tahrir davası» mabüsleriniñ (Aqmescitteki birinci gruppa) ükmüni deñiştirdi. Qırımlılarnıñ apis cezaları 6 ayğa eksildi.
Böylece, Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov 11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
2019 senesi iyün ayında Rostov-na-Donunıñ Cenübiy okrugınıñ arbiy mahkemesi bu dava mabüsleri Teymur Abdullayevni 17 yılğa, Uzeir Abdullayevni 13 yılğa, Rustem İsmailovnı 14 yılğa, Ayder Saledinov ve Emil Cemadenovnı 12 yılğa üküm etti.
Ukraina Tış işler nazirligi bu davağa narazılıq bildirip, Rusiyege qarşı sanktsiyalarnı quvetleştirmege çağırğan edi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
