Dekabrniñ 28-nde Qırımdan qomşu Rusiyeniñ Rostov-na-Donudaki SİZO-1-ne avuştırılğan Bağçasaraydaki «Hizb ut-Tahrir davasınıñ» mabüsi Zekirya Muratovğa qarşı qabaatsızlıq prezumptsiyası bozula, dep tüşüne advokat Edem Semedlâyev. Bu aqta «Qırım birdemligi» cemaat birleşmesi Qırım.Aqiqatqa bildirdi.
Semedlâyevniñ birleşmege bildirgenine köre, Muratov bir aydan berli Rusiye SİZOsında buluna, bundan evel ise işğal etilgen Qırımdan Aqmescitten zornen çıqarıldı. O, 60 yaşında ve 3-ünci derece saqatıdır.
Advokatnıñ aytqanına köre, qabaatı daa isbatlanmasa da, qırımlığa telükeli cinayetçige kibi yanaşalar.
«Apiske alınğan ilk künlerinden berli olarğa terroristlerge kibi yanaşalar, bugünki körüşüv de istisna degil. Körüşüv odasında onı birden pek tar «qafeske» qapatqanlar. Armaturadan yapılğan, şunıñ içün qafes aytam», – dedi imayeci.
Advokatnıñ tarif etkenine köre, o, itiraz bildirgen soñ, Cezalarnı yerine ketirüv federal hızmetiniñ hadimi bunı video çıqaracaq ve mabüsni kartserge qapatacaq, dep qorquzıp başladı. Semedlâyevniñ bildirgenine köre, o, bunı şikâyet etecek ola.
Rusiyeniñ Cezalarnı yerine ketirüv federal hızmetiniñ hadimleri Edem Semedlâyevniñ aytqanlarını şimdilik izaatlamadı.
Hatırlatamız, 2020 senesi dekabr ayında Zekirya Muratovnıñ Qırımdan Rusiyege etap etilgeni belli oldı. Rusiye quvetçileri Zekirya Muratovnı iyülniñ 7-nde tuttı. FSB, onı «Hizb ut-Tahrir» bölüginde iştirak etkeninde qabaatlay.
Rusiye quvetçileriniñ areketlerini Ukraina prezidentiniñ Qırım Muhtar Cumhuriyetindeki daimiy temsilciligi takbih etti, Qırım Muhtar Cumhuriyeti ve Aqyardaki Milliy politsiya Baş idaresi tintüvler aqqında Ukraina Ceza kodeksiniñ 162-nci maddesiniñ 2-nci qısmına (mesken tiyilmemezligini bozuv) ve Ukraina Ceza kodeksiniñ 146-ncı maddesiniñ 2-nci qısmına (qanunsız alda azatlıqtan marum etüv) istinaden cinaiy tahqiqat başlattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
