Bağçasaraydaki üçünci «Hizb ut-Tahrir davasınıñ» mabüsi Zekirya Muratov Qırımdan Rusiyege etap etildi. Şimdi o, Armavir şeerinde buluna. Bu aqta advokat Emine Avamileva bildirdi, dep haber ete «Qırım birdemligi» cemaat birleşmesi.
"Dekabrniñ ortasına qadar bulunğan yerini bilmey edik. Muratovnıñ özü aytqanına köre, o, dekabrniñ 18-nde Aqmescit SİZOsından çıqarıldı, dekabrniñ 19-nda Krasnodar SİZOsınıñ mahsus blokunda edi. Soñra onı Armavirge etap etkenler. Şimdi Armavirde buluna. Eki künden berli. Kamerada ondan ğayrı daa 10 insan buluna. Tutuv şaraitleri bir qarar», – dep ayttı advokat Emine Avamileva.
Haber etilgenine köre, dekabrniñ 25-nde qırımlınıñ apiske alınmasına qarşı istinaf arizası baqıldı, lâkin mahkeme advokatlarnıñ delillerine emiyet bermeyip, Muratovnı SİZOda qaldırdı.
Rusiye quvetçileri Zekirya Muratovnı iyülniñ 7-nde tuttı. FSB, onı «Hizb ut-Tahrir» bölüginde iştirak etkeninde qabaatlay.
Rusiye quvetçileriniñ areketlerini Ukraina prezidentiniñ Qırım Muhtar Cumhuriyetindeki daimiy temsilciligi takbih etti, Qırım Muhtar Cumhuriyeti ve Aqyardaki Milliy politsiya Baş idaresi tintüvler aqqında Ukraina Ceza kodeksiniñ 162-nci maddesiniñ 2-nci qısmına (mesken tiyilmemezligini bozuv) ve Ukraina Ceza kodeksiniñ 146-ncı maddesiniñ 2-nci qısmına (qanunsız alda azatlıqtan marum etüv) istinaden cinaiy tahqiqat başlattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
