Qırımda patlayıcı madde saqlağanında qabaatlanğan Denis Kaşuknıñ imaye tarafı müvekkiline çıqarılğan ükümni şikâyet etmege planlaştırmay. Bu aqta advokat Sergey Legostov Qırım.Aqiqatqa tarif etti.
«Üç yıl ve sekiz ay – müvekkilimiz qabaatlanğan üç cinayet içün yengil bir ceza. İmaye tarafınıñ şikâyet arizasını bermege niyeti yoq. Mence, Denis ükümni bu vaziyette mümkün olğanı qadar raat qabul etti», – dedi advokat.
Rusiye kontrolindeki Ermeni Bazar şeer mahkemesiniñ qadısı Larisa Lihaçeva aqyarlı Denis Kaşuknı üç yıl ve sekiz ay umumiy rejim koloniyasında qalmasına üküm etti. Üküm 10 kün içinde işke tüşürilecek.
2019 senesi dekabr ayında Rusiye quvetçileri Kaşuknı tuttı. FSB, onı üç maddege istinaden qabaatlay – Rusiye Ceza kodeksiniñ 222, 222.1, 226.1 maddesiniñ birinci qısmı (silâ, onıñ parçaları, patlayıcı maddelerni qanunsız satın aluv, berüv, satuv, saqlav, taşuv).
Denis Kaşuk 2019 senesi dekabrniñ 20-nden berli Aqmescit SİZOsında buluna.
Daa soñra belli olğanına köre, Kaşuv mustaqil imayecilerden vazgeçti. Bu malümatnı aqmescitliniñ imayecilerinden biri olğan Nazim Şeyhmambetov Qırım.Aqiqatqatasdıqladı.
Apiske alınğannıñ tuvğanları, Kaşuknıñ mustaqil advokatlardan vazgeçkenini tasdıqladı, amma bunı yaqınlarınıñ telükesizligi içün yapmağa mecbur, dep aytalar.
Qırım Muhtar Cumhuriyetiniñ prokuraturası Aqmescit sakini Denis Kaşuknıñ tutuluvı ve qanunsız aldı azatlıqtan marum etilüvi sebebinden Ukraina Ceza kodeksiniñ 146-ncı maddesiniñ 1-inci qısmına istinaden (qanunsız alda azatlıqtan marum etüv) cinaiy tahqiqat başlattı.
