Qırımda devlet hainliginen qbaatlanşğan ve apis cezasına mahküm etilgen Qırım sakini İvan Yatskinniñ advokatı Nikolay Polozov mahkeme qararını temyiz etti. Bunı o Qırım.Aqiqat mühbirine bildirdi.
«Şimdilik qısqa şikât berdim, tafsilâtlı şikât içün qolumda mahkeme oturışınıñ qararı olmalı. Protokolnı alâya daa bermediler, çünki reislik yapqan qadı Alla Hineviç diger dava boyunca mesleatlaşuv odasında, onıñ imzası olmadan ise protokolnı bermeyler. Şikâyetni İvan Grigoriyeviç bermege istedi. Bizim mevamımız şunda ki, bir sıra yımşatıcı allarnı köz ögüne alıp, üküm pek qattıdır», – aytıp berdi advokat.
Mayısnıñ 21-nde Rusiye nezaretinde olğan Qırımnıñ Yuqarı mahkemesi «devlet hainliginen» qabaatlanğan Qırım sakini İvan Yatskinge üküm çıqardı. Alla Hineviçniñ reisliginde qadılar kollegiyası İvan Yatskinni bir yıl sıñırlav ile 11 yıl sert apis cezasına mahküm etti.
Ukraina TİN dünya toplulığını İvan Yatskinge çıqarılğan ükümge cevap bermesine çağırdılar.
Ukraina Yuqarı Radasınıñ insan aqları vekâletlisi Lüdmila Denisova «devlet hainliginen» qabaatlanğan İvan Yatskinniñ ukmüni takbih etti.
Yatskin «devlet hainliginen» qabaatlandı (Rusiye ceza qanunnamesiniñ 275 maddesi – QA). Bu dava boyunca bütün mahkeme oturışları qapalı keçirildi, mahkeme, dava materiallarında devlet sırı olğanına atfı ete edi.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu dekabr ayında belli oldı.
Rusiye tahqiqatı, Yatskin Qırımda olıp, UMT ile işbirlik yaptı ve «Rusiyeniñ devlet sırı» olğan malümatnı olarğa bildirdi, dep ayta.
Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.
«Memorial» aq qorçalayıcı merkezi İvan Yatskinni siyasiy mabüs dep tanıdı.
