Advokat Emil Kurbedinov tünevin tevqif etilgen Edem Semedlâyevni muvaqqat tutuv izolâtorında yoqladı.
"Şimdiçik onı ziyaret ettim. O, muvaqqat tutuv izolâtorındadır, qanunğa köre, anda cezaiy mesüliyetke celp etilgen şahıslar tutula, yani cinayet yapqanınen qabaatlanğan ya da şübeli sayılğanlar. Memuriy uquq bozmağa köre tevqif etilgenler içün mahsus izolâtor bar. Qaysı bir sebepten bilmeyim, tamir işler anda kete ya da daa bir şey, amma Edem muvaqqat tutuv izolâtorındadır ve andaki şarait qattıca", - dep yazdı Kurbedinov.
Onıñ sözlerine köre, Semedlâyev kamerada bir özü degil, onen beraber daa bir qaç tevqifli buluna.
"O, mükemmel dayana ve onıñ etrafındaki, advokatlar etrafıdaki bütün vaziyetni añlay ve bu kerçekten bütün advokatlar içün bir çağuruvdır... Sistema, insanlarğa yardım etmege istegen advoktalarnı cezalamağa, qorqutmağa tırışa", - dep qayd etti o.
Kurbedinov, Semedlâyev er keske destek ve yardım içün teşekkür etkenini bildirdi.
Noyabrniñ 11-nde Rusiye kontrolindeki Aqmescitniñ Kiyev rayon mahkemesi advokat Edem Semedlâyevni 12 künge apiske aldı ve Ekstremizm ile küreş merkeziniñ hadimlerinden biriniñ ögünde soyunmaqtan red etkeni içün 4 biñ ruble para cezasını berdi.
Cumaertesi künü, oktâbrniñ 25-nde, Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
