O, aynı penitentsiar müessisede buluna. «Riza Bilâl ağa da Minusinskte, er şey yahşı, dep yaza», – dep tarif etti Sevilâ Omerova.
Bilâl Adilovnıñ apayı Gülnara bu apishanege ve Yeniseysk şeeriniñ apishanesine muracaat etken edi, amma hadimler qadınğa cevap bermedi. Bir aydan berli soy-sopları qayda olğanını bilmey edi. Soñki sefer apayına iyün ayında bağlanğan edi, Novoçerkassk SİZOsına etap etilmezden evel.
Aq qorçalayıcılar Adilovnıñ qorantası bir aydan berli angi Rusiye apishanesine etap etilgenini bilmey, dep bildirgen edi.
Bilâl Adilov – altı bala babası, din erbabı. Apiske alınmazdan evel bir qaç yıl devamında qırımtatar halqınıñ cemaat yaşayışında faal iştirak etti, mahkeme, tintüvlerge bardı, siyasiy mabüslerniñ qorantalarına yardım etti.
2022 senesi mayısnıñ 12-nde Rostov-na-Donudaki Cenübiy okrugınıñ arbiy mahkemesi qırımtatarlarnı «Hizb ut-Tahrir» teşkilâtına alâqası bar olğanında qabaatladı. Bilâl Adilov, Tofik Abdulgaziyev, Vladlen Abdulkadırov, İzzet Abdullayev ve Mecit Abdurahmanov umumen 62 yılğa azatlıqtan marum etildiler.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
