Canköydeki ekinci «Hizb ut-Tahrir davasınıñ» mabüsi qırımlı Osman Abdurazakovnı psihiatrik hastahanege mecburiy ekspertizağa çıqarğanlar, dep haber ete «Qırım birdemligi».
«Osman Abdurazakov mahkeme psihologik-psihiatrik ekspertizasınıñ keçirilüvi içün №1 Qırım cumhuriyet klinik psihiatrik hastahanesiniñ 15-inci bölügine etap etildi. Eñ az 3 afta devam etecek, dep tüşünem», – dep ayttı advokatı Emine Avamileva.
Psihiatrik ekspertizadan evel siyasiy mabüs Aqmescitniñ №1 tahqiqat izolâtorında bulundı, dep bildirdi advokatı.
Daa evel psihiatrik ekspertizadan keçmesi içün cinaiy davanıñ diger mabüsleri psihiatrik hastahanege yollanılğan edi: 67 yaşında Halil Mambetov, Ekrem Kroş ve Refat Seydametov.
Yanvarniñ 24-nde saba Canköy rayonında Rusiye uquq qoruyıcıları qırımtatarlarnıñ evlerinde tintüv keçirdi: Nemse Canköy (Blijnegorodskoye) köyünde Ekrem Kroş, Timofeyevka köyünde Ayder Asanov ve Refat Seydametov, Çoqraqlı Şeyh Eli köyünde (Dneprovka) Osman Abdurazakov, Canköyde Leman Zekiryayev ve Halil Mambetovnıñ evini.
Ekrem Kroşnıñ ömür arqadaşı Amideniñ «Qırım birdemligi» cemaat teşkilâtına bildirgenine köre, Qırım şimalinde tutulğan qırımtatarlar «terrorizmde» qabaatlana bile. Qırımlı musulmanlarğa mustaqil advokatlar alınmay, dep haber etilgen edi.
Qırımnıñ Rusiye yolbaşçısı Sergey Aksenov yanvarniñ 24-nde saba qırımtatarlarnıñ evlerinde keçirilgen tintüvlerni izaatladı. Onıñ aytqanına köre, uquq qoruyıcılar «Ukrayına ile alâqaları» bar olğanında qabaatlanğan altı vatandaşnı tuttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
