Beş yıl evelsi koloniyağa kelgeninden berli Teymurnı bir kere bile koloniyanıñ otrâdına avuştırmağanlar. Kelgeninen koloniya memuriyeti Teymurnı sebepsiz bir şekilde ceza odasına avuştırdı ve o vaqıttan berli onı anda tutalar, dep qayd ete temsilcilik. Onıñ izolâtsiyada qalması «bozuvlar» aqqında uydurma qabaatlavlar manaçığınen devam ete.
Dilâra Abdullayeva qayd etkenine köre, tutuv şartlarınıñ sistematik bozulması oğullarınıñ sağlığına ciddiy zarar ketirdi. Teymur gipertonik kriz, hronik buğum ağrılarından, büyrek ve aşqazan-içek yollarınıñ faaliyeti bozulğanından çekişe. Qışta araret şaraitleri pek zor olğan ceza odanıñ dım, suvuq odalarında uzun vaqıt qalmaq onıñ beden alını ep zorlaştıra. O, Teymurnıñ tutuv şaraitleri ve kerekli tibbiy yardım alamağanından sıq-sıq esini coyğanını qayd ete.
Dilâra Abdullayeva emin ki, ceza odasında uzun vaqıt qalmaq – muntazam bir işkencedir, onıñ maqsadı tek izolâtsiya etmek degil, oğlunıñ iradesini ve sağlığını usuliy yolnen yoq etmektir. O, koloniya idaresinden bir qaç kere tsinik cevaplar alğanını ayttı, olardan birisi: «Ölse – haberiñiz olur».
İlâclarğa acele ihtiyac olğanına baqmadan, Teymurnıñ ilâclarına irişmek imkânı ep sıñırlanğan. O, buğumlarnı ve qan basımını tedaviylemek içün ağrı kesken ilâclarnı, em de aşqazan ilâclarını yollamağa rica etti, amma koloniya idaresi suniy manialar yaratıp, bunı yasaqlay.
Bundan da ğayrı, Teymur Abdullayevniñ apis şaraitleri qasevetlendire. O, buzlu divarlı eki metrlik odada buluna, anda tek bir kürsü bar. Töşek saba saat beşte divarğa köterile, aqşam saat 22-ge qadar şu alda qala, Teymurnı bütün kün turmağa ya da oturmağa mecbur ete, onıñ alını daa da beterleştire. Dilâra oğlunıñ beton polda uzun vaqıt turğanından daima ağrı olğanını sıq-sıq hatırlağanını, şunıñ içün de onıñ büyrek ve siydik quvuğı ağır suvuqlanğanını ayta. Teymurnıñ sağlığı çoqtan sıñırda, lâkin koloniya idaresi onıñ ömrü içün havflı olğanı aqqında bir çoq alâmetni közge almamağa devam ete.
Daa bir qardaş Uzeir Abdullayevniñ vaziyeti de bundan yahşı, o da Salavat şeerinde koloniyada buluna. Ekimlerniñ resmiy diagnozını qoyğanlarına baqmadan, koloniya memuriyeti onı ceza odasına yollamağa devam ete. 2023 senesi aprel ayında o, silecekni qurutqanı içün 10 kün izolâtsiyada bulundı. Bu müddetten soñ ekim ceza odasında qalmaq onıñ sağlığı içün havflı olğanını itiraf ete, amma koloniya memuriyeti tibbiy tevsiyelerni kene boza.
Rostov-na-Donudaki Cenübiy okrugınıñ arbiy mahkemesi 2019 senesi iyün ayında Aqmescitniñ «Hizb-ut-Tahrir davasınıñ» mabüslerine üküm çıqardı. Soñra Rusiye Yuqarı Mahkemesi qırımlar içün cezanı deñiştirdi.
Böylece, Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
Bundan evel, martnıñ 16-nda, Ukrayina Baş prokuraturası Abdullayevniñ ceza kamerasında tutulğanı sebebinden istilâcı memleketniñ toprağında akimiyet vekilleri tarafından cenk qanunlarını ve adetlerini bozuv cinaiy dava (Ukrayina Cinaiy kodeksiniñ 438-inci maddesiniñ 1-nci qısmı) başlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
