Amerika Birleşken Devletleri Aluştadaki «Hizb ut-Tahrir davasınıñ» mabüslerine qarşı qabaatlavnı «sahte» dep saya, çıqarılğan ükümni ve avgustnıñ 17-nde yarımadada qırımtatarlarnıñ tutuluvını takbih ete.
«Rusiyeniñ dört qırımtatarına çıqarğan ükmüni – uydurılğan «ekstremizm» qabaatlavları boyunca 12-18 yıl apis ve 5 qırımtatar faaliniñ tutuluvını takbih etemiz», – dep aytıla ABD Ukraina elçihanesiniñ Twitter haberinde.
Moskvada çarşenbe künü, avgustnıñ 18-nde, faaller avgustnıñ 16-nda ükmü çıqarılğan Aluştadaki «Hizb ut-Tahrir davasınıñ» mabüslerine qoltutuv aktsiyasını ötkerdi.
Avgustnıñ 16-nda Rusiye mahkemesi qırımlılarnı üküm etti:
- Ruslan Mesutov – 18 yıl sert rejimli koloniyada azatlıqtan marum etilecek, azat etilgen soñ azatlığı 1 yıl devamında sıñırlanacaq;
- Lenur Halilov – 18 yıl sert rejimli koloniyada azatlıqtan marum etilecek, azat etilgen soñ azatlığı 1 yıl devamında sıñırlanacaq;
- Eldar Kantimirov – 12 yıl sert rejimli koloniyada azatlıqtan marum etilecek, azat etilgen soñ azatlığı 1 yıl devamında sıñırlanacaq;
- Ruslan Nagayev – 13 yıl sert rejimli koloniyada azatlıqtan marum etilecek, azat etilgen soñ azatlığı 1 yıl devamında sıñırlanacaq
Ukraina Tış işler nazirili Aluştadaki «Hizb ut-Tahrir davası» mabüsleriniñ ükmüne qarşı narazılıq bildirdi.
Büyük Britaniya Ukraina elçisi Melinda Simmons Rusiyeni Aluştadaki «Hizb ut-Tahrir davası» mabüslerini «acele azat etmesine» çağırdı.
ZMINA insan aqları merkezi, Vatandaş serbestlikleri merkezi ve «KrımSOS» Aluştadaki «Hizb ut-Tahrir davasınıñ» mabüslerine çıqarılğan ükümni takbih etti.
Avropa Birligi, Rusiyede dört qırımtatarına çıqarılğan ükümni qanunsız dep saya.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
