ABD Ukraina elçihanesi Rusiyeniñ işğal etilgen Qırımda Aqmescit SİZOsında tutulğan qırımtatar faali Edem Bekirovğa köstergen «ayıp munasebetini» takbih etti. Bu aqta Amerika diplomatik temsilciligi Facebook saifesinde yazdı.
«Rusiyeniñ qırımtatarlarnı sistematik taqip etüvini ve sağlıq vaziyeti ket-kete daa beter olğan Edem Bekirovğa ayıp munasebetini takbih etemiz. Rusiye Aqyar camisinde keçirgen tintüvleri ve imamı Rustem Abilevniñ tutulmasından da qasevetlenemiz», – dep aytıla haberde.
Aprelniñ 15-nde Aqyarnıñ Balıqlava rayonındaki Yañı Şüli (Şturmovoye) köyünde Aqyar soq., 48 adresi boyunca imam Rustem Abilevniñ evinde tintüvler keçirildi. Tahqiqat tedbirleri başta Abilevniñ imamlıq yapqan camide keçirildi, soñra uquq qoruyıcılar Rustem Abilevniñ evine keldi. Daa soñra Rustem Abilev Aqyardaki Rusiye FSBsiniñ idaresine ketirildi. Rusiye FSBsi aqyarlı «ekstremist faaliyetine çağıruv yapqanından» şübheli sayılıp yaqalandı, dep bildire.
Ukraina Yuqarı Radasınıñ insan aqları vekâletlisi Lüdmila Denisova Bekirov tibbiy teşkerüvge yollanmalı, dep bildirgen edi. Tibbiy teşkerüvden soñ berilgen insulin iñektsiyaları sebebinden allergiyası olğan edi.
Rusiye kontrolindeki Aqmescitniñ Kiyev rayon mahkemesi silâ ve patlayıcı maddelerni saqlağanında qabaatlanğan Bekirovnıñ tevqif müddetini eki ayğa uzattı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
