Rusiye, Ukraina ile sıñırda ordusınıñ toplanması ile bağlı OSCE aza devletleriniñ oturışında iştirak etmekten red etti, dep haber ete ABD temsilciligi.
«Rusiye, bugünki OSCE aza devletleriniñ oturışında iştirak etip, Ukraina ile sıñırda ve işğal etilgen Qırımda ordusınıñ toplanmasını añlatmaqtan red etti», – Azatlıq Radiosı Vaşingtonnıñ bildirmesinden alıntı ketire.
ABD temsilciligi Moskvanıñ «Viyana vesiqasında közde tutulğanı kibi qorqunı sakinleştirmek ve telükelerni azlaştırmaq içün bu fırsattan faydalanmamağa» qararından yazıqsınğanını bildirdi.
Evel, aprelniñ 10-nda Vaşington OSCE oturışını ilân etken edi. Anda Rusiye, Ukraina ile sıñırda ordusınıñ toplanması ile bağlı añlatmalar yapmaq kerek edi.
Evel Ukraina Silâlı Quvetleri Baş ştabınıñ yolbaşçısı Ruslan Homçak bildirdi ki, martnıñ başında Novorossiysk ve Stavropolden işğal etilgen Qırımğa talimler içün avuştırılğan Rusiye ordusı yarımadada qalmağa devam ete.
Rusiye prezidenti Vladimir Putinniñ matbuat kâtibi Dmitriy Peskov bildirgenine köre, «Rusiyeniñ memleket topraqlarında istegeni kibi ordu avuştırmağa aqqı bar».
Beyaz ev ABD prezidenti Joseph Biden ve Ukraina devlet başı Volodımır Zelenskıy telefondan laf etkenlerini resmiy tasdıqladı ve Amerika devlet başı «Rusiyeniñ Qırım ve Donbastaki devam etken tecavuzı qarşısında Ukrainağa» destegini tasdıqlağanını bildirdi.
