ABD devlet kâtibi Mike Pompeonıñ yardımcı muavini George Kent 1944 senesi qırımtatar sürgünligi qurbanlarını añma kününde «qırımtatar halqınıñ itibarı, dayanıqlığı ve küçüni» alğışladı. O, Rusiyeni «Qırım işğalini tez vaqıtta bitirmesine» de çağırdı.
«Sovet lideri İosif Stalin NKVD bölüklerine insaniyetlikke qarşı büyük bir cinayet yapmağa emir etti: qırımtatar halqını ayvan vagonlarında Orta Asiyağa sürgün etmege avale etildi. Qırımtatarlarnıñ aman-aman yarısı ilk yılda elâk oldı, olarnıñ arasında apayımnıñ qartanası Maube de bar edi», – dep tarif etti George Kent Twitter muracaatında.
Onıñ aytqanına köre, bugünde-bugün Rusiye akimiyeti işğal altındaki Qırımda qırımtatarlarnı qorquzmağa tırışa. Tahminen 70 insan siyasiy mabüs ola.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
