ABD OSCE missiyası, Qırımdaki Rusiye mahkemesi 150 biñ ruble para cezası bergen ve tintüv vaqtında antika silâsı tapılğan Sudaq regional Meclisiniñ reisi İlver Ametovnıñ «davasını diqqatnen taqip ete», dep bildirdi. Bu aqta ABD missiyasınıñ siyasiy mesleatçısı vazifelerini eda etken Leyn Darnell Bal Viyanadaki çıqışı vaqtında bildirdi.
«Evinde keçirilgen tintüv vaqtında tapılğan Ekinci cian cenki zamanından qalğan totlu silâsını saqlap qalğanı içün dört yıl apis cezası berilmesi mümkün olğan Sudaq qırımtatar regional Meclisiniñ 69 yaşında lideri İlver Ametov üzerindeki esnasnı taqip etemiz. Qırımtatar siyasiy mabüslerine qarşı sovet cezalayıcı psihiatriyasınıñ qullanıluvını takbih etemiz», – dep aytıla ABD vekiliniñ çıqışında.
Balniñ aytqanına köre, Rusiye Ukrainanıñ suveren toprağı olğan Qırımnı «nükleer uçaq ve raketalar, diger silâ ve arbiyler» yardımınen askeriyleştirdi.
ABD OSCE elçisi James Gilmore Rusiye Qırımnıñ qanunsız işğali ve askeriyleştirilüvini, qırımtatarlarğa qarşı repressiyalarnı devam ettire, dep bildirdi.
Kreml kontrolindeki Sudaqnıñ Mirovoy mahkemesi 2019 senesi sentâbrniñ 27-nde Rusiye quvetçileri tintüv keçirgen Sudaq regional Meclisiniñ reisi İlver Ametovğa 150 biñ ruble miqdarında para cezasını bermege qarar aldı. Ametovnıñ Qırım.Aqiqatqa bildirgenine köre, para cezası onıñ iş adamı faaliyetinen bağlı. Qararğa köre, para cezası «telükesizlik talaplarına uymağan mallarnı istisal etüv ve satuv sebebinden» berildi.
Sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ reisi Refat Çubarov bir qaç on silâlı Rusiye quvetçisi İlver Ametovnıñ evini blok etti, dep bildirgen edi.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Sudaqtaki tintüvlerden soñ Ametovnıñ Qırımtatar Milliy Meclisiniñ aza şeadetnamesi, müzey eksponatları, bazı vesiqalar «ekspertizağa» alındı.
Advokat Nazim Şeyhmambetovnıñ Qırım.Aqiqat mühbirine bildirgenine köre, Rusiye quvetçileri tintüvlerni Rusiye Ceza kodeksiniñ 280, 282 ve 238 maddelerine istinaden cinayetlerden şübhe bar olğanı içün «tahqiqattan evel teşkerüvi çerçivesinde» keçirdi.
Rusiye quvetçileri İlver Ametovnıñ evini endi tintken edi. Birinci tintüv 2015 senesi dekabr ayında, o, hastahanede olğanda, keçirilgen edi. Sebebi belli degil. 2017 senesi mayısında quvetçiler tekrar kelip, oğlunı tuttı.
