Rusiyeniñ Ukrainağa keñiş mıqyaslı istilâsı sebebinden toqtatılğan "Şimaliy aqım-2" gaz hattısı "ölü"dir. Bunıñ aqqında ABD Devlet kâtibiniñ muavini Viktoriya Nuland bildirdi.
"Şimaliy aqım-2" leyhası artıq ölüdir, dep sayam… Bu, deñizniñ tübünde bir maden parçasıdır, bir vaqıt kene işler devam etip başlamaz, dep tüşünem", - Amerika qanun çıqarıcıları ögünde dedi Nuland. Bunı AFP agentligi haber ete.
Fevralniñ 22-nde Almaniya kantsleri Olaf Şölts, ükümet "Şimaliy aqım-2" Rusiye-Almaniya gaz borusınıñ sertifikatsiya esnasını toqtatqanınıilân etti. Onıñ sözlerine köre, qarar Rusiye-Ukraina çatışmasınıñ kerginleşmesi ve Kremlniñ "DNR" ve "LNR" gruppalarını "tanıması" üzerinde alınğan. Bunıñ aqqında fermannı Vladimir Putin keçenlerce imzaladı.
Martnıñ 1-nde Rusiyeniñ "Şimaliy aqım-2" gaz hattısınıñ operatorı Ğarbiy sanktsiyalar sebebeinden özüni müflis ilân etti. Bunı SRF İsviçre agentligine Tsug katonınıñ iqtisat naziri Silviya Talmann-Gut bildirdi.
"Şimaliy aqım-2" Baltıq deñiziniñ tübünden Üst-Luga Rusiye şeerinden Almaniyanıñ Grayfsvald şeerine qadar töşelgen gaz hattısıdır. Borularnıñ çekilmesi 2021 senesi sentâbr ayında tamamlandı.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete. Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
