Fevralniñ 22-nde Ukraina Yuqarı Radasında "DNR" ve "LNR" gruppalarınıñ nezaretinde olğan Donetsk ve Lugansk vilâyetleriniñ bazı rayonlarınıñ Rusiye tarafından "mustaqilliginiñ" tanılması ile bağlı beyanatqa rey berildi. Muvafıq beyanatqa 336 millet vekili qotuttı.
"Bu qararnı qabul etip, Rusiye Federatsiyası asılında bir taraflı olaraq, özü de imzalağan Minsk añlaşmalarından çıqtı ve Normandiya formatından iştirak etken memleketler seviyesinde ve Ukrainanıñ Donetsk ve Lugank vilâyetleriniñ ayrı rayonlarında vaziyetniñ tınç çezilmesinden Üç taraflı kontakе gruppası çersivesinde muvafıq aytışuv esnasını yoq etti", - dep yazıla vesiqada.
Vesiqada, "Ukraina halqara silâlı çatışmanıñ siyasiy ve diplomatik al yoluna sadıq qala", dep yazılğan.
Fevralniñ 21-nde Rusiye prezidenti Vladimir Putin Rusiye Telükesizlik Şurasınıñ oturışından soñ "DNR" ve "LNR" qanunsız silâlı gruppalarnıñ "tanıluvı" aqqında ilân etti.
Fevralniñ 22-nde Almaniya kantsleri Olaf Şölts, ükümet "Şimaliy aqım-2" Rusiye-Almaniya gaz borusınıñ sertifikatsiya esnasını toqtatqanını ilân etti. Onıñ sözlerine köre, qarar Rusiye-Ukraina çatışmasınıñ kerginleşmesi ve Kremlniñ "DNR" ve "LNR" gruppalarını "tanıması" üzerinde alınğan. Bunıñ aqqında fermannı Vladimir Putin keçenlerce imzaladı.
Büyük Britaniya beş Rusiye bankına sanktsiyalar qoyacaq, dep bildirdi memleketniñ baş naziri Boris Conson.
