Avropa Birligi "Qırım platformasına" tam destek bildirip Beyannamesiniñ maddelerini eda etmege azır. Bunı oktâbrniñ 13-nde onlayn brifing vaqtında Ukraina TİN başı Dmıtro Kuleba bildirdi.
"Bu, Qırım platformasınıñ bir kereklik PR-tedbiri olğanı, iç bir ciddiy devamı olmaycağı aqqında iddia etken ekspertlerniñ ve siyasetçilerniñ spekulâtsiyalarını, yañlış malümatını yoq ete. Memleketniñ, hususan Qırımnıñ qaytarılması mevzusında faal, cesaretli, teşebbüsli tış siyasetine keçkeni AB-de kerekli şekilde körüldi ve qayd etildi", - dedi Kuleba.
Ukraina TİN başı Dmıtro Kuleba oktâbrniñ 12-nde 23-nci Ukraina-AB sammiti vaqtında Avropa Birliginiñ başı Jozep Beorrelge muracaat etip, Qırımda insan aqlarını bozğanlarğa qarşı daa sert sanktsiyalar qoymağa çağırdı.
Oktâbrniñ 12-nde Kyivde 23-nci Ukraina-AB sammiti olıp keçti. Avropa Birliginden Avropa Şurasınıñ prezidenti Şarl Mişel ve Avropa Komissiyasınıñ prezidenti Ursula fon der Lâyyen iştirak etti ve Ukrainanıñ devlet başı Volodımır Zelenskıy iştirak ettiler.
Sammitniñ neticelerine köre, Rusiyeni siyasiy mabüslerni azat etmege, qırımtatarlarnıñ taqip etilüvini toqtatmağa, Azaq ve Qara deñizlerinde serbest ve telükesiz navigatsiyanı temin etmege çağırğan ortaq beyanat qabul etildi.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
