İşğal etilgen Qırımdaki Rusiye akimiyeti BM tamır halqlarınıñ aqları beyannamesiniñ 18 maddesini bozdı. Bu aqta «Krım SOS» aq qorçalayıcı teşkilâtı talilcisi Yevğeniy Yaroşenko Ukrayınska pravda saytı içün maqalede yazdı.
«Tamır halqlar Qırım ealisiniñ 13-15%-ı teşkil ete, faqat sıq-sıq repressiyalardan zarar köre. «Krım SOS» malümatına köre, qırımlı siyasiy mabüslerniñ 80%-ı qırımtatarlar ola», – dep bildirdi Yevğen Yaroşenko.
Qırımnıñ Rusiye akimiyeti bozğan BM tamır halqlarınıñ aqları beyannamesiniñ maddeleri arasında: tamır halqlarnıñ ayırımğa oğramamaq, öz kütleviy haber vastalarını qurmaq, tabiatnı saqlav ve qoruv aqqı ve tamır halqlarnıñ toprağında arbiy faaliyetten serbestlik aqqı.
«Bundan ğayrı, işğal altındaki Qırımda qanunsız tintüvlerniñ 75%-ı qırımtatarlarnıñ evlerinde keçirile, şunıñ içün bazı qırımtatar qorantalarında böyle aytalar: saba tintüvsiz keçse, bu hayır bir saba», – dep qoşa talilci.
Ukraina prezidentiniñ Qırım Muhtar Cumhuriyetindeki temsilciligi bildirdi ki, Qırımdaki Rusiye akimiyetiniñ faaliyeti sebebinden tamır halq vekilleriniñ aqları muntazam sürette bozula.
Ukrayına prezidenti Volodımır Zelenskıy 2021 senesi iyülniñ 21-nde teşebbüsçisi olğan №1616-IX «Ukrayınanıñ tamır halqları» qanunını imzaladı, 2021 senesi iyülniñ 1-nde Yuqarı Rada onı qabul etti. Qanunğa köre, qırımtatarlar, qaray ve qırımçaqlar Qırım yarımadasında şekillengen Ukrayınanıñ tamır halqları ola.
«Qırımtatar Resurs Merkezi» içtimaiy ağlarda avgustnıñ 9-nda qayd etilgen Dünya tamır halqlar kününen bağlı «ücümni» başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
