Qırımdaki Rusiye akimiyetiniñ faaliyeti sebebinden tamır halq vekilleriniñ aqları muntazam sürette bozula. Bu aqta Ukraina prezidentiniñ Qırım Muhtar Cumhuriyetindeki temsilciligi avgustnıñ 9-nda qayd etilgen Dünya tamır halqlar künü munasebetinen yapqan beyanatında aytıla.
«Rusiye oña qoltutmağan qırımtatar halqını yoq etmek içün elinden kelgenini yapa: siyasiy repressiya, ayırım, işkence ve qorquzuv qullana, Qırımnıñ demografik terkibini deñiştire. Şunıñ içün bugün Rusiye Federatsiyasınıñ yapqan qanunsızlığını toqtatmaq içün Ukrayına yarımadasınıñ tezce işğalden azat etmek kerek olğanını daa bir kere qayd etemiz», – dep aytıla haberde.
EdEra online tasil studiyasınen beraber Ukrayına institutı «Crimea: History and People» bedava online kursını başlattı.
Ukrayına prezidenti Volodımır Zelenskıy 2021 senesi iyülniñ 21-nde teşebbüsçisi olğan №1616-IX «Ukrayınanıñ tamır halqları» qanunını imzaladı, 2021 senesi iyülniñ 1-nde Yuqarı Rada onı qabul etti.
Qanunğa köre, qırımtatarlar, qaray ve qırımçaqlar Qırım yarımadasında şekillengen Ukrayınanıñ tamır halqları ola.
Rusiye Devlet duması Ukrayınanıñ tamır halqlar qanun leyhasını takbih etken beyanatnı qabul etti. Rusiye prezidenti Vladimir Putin Ukrayınanıñ tamır halqları qanun leyhası «ruslarğa qarşı küçlü bir darbe» ola dep, onı kütleviy öldürüv silâsınen qıyasladı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
