Rusiye ordusınıñ Mıkolayıvge saba açqaye ateşi neticesinde eñ az beş kişi elâk oldı. Bu aqta Mıkolayıv vilâyetiniñ arbiy memuriyet yolbaşçısı Vitaliy Kim bildirdi.
Onıñ aytqanına köre, darbe cemaat naqliyatınıñ durağına endirildi.
«Şimdilik yedi yaralanğan ve beş elâk olğan kişi aqqında belli», – dep haber etti Kim.
Bugün Mıkolayıvnıñ şeer yolbaşçısı Öleksandr Senkevıç şeerge kaseta snarâdlarınen ücüm etildi, dep ayttı.
Tünevin aqşam da Mıkolayıv Rusiye Federatsiyasınıñ ordusı tarafından ateşke oğradı.
Şahsiy evlerniñ azbarlarına ateş etildi. Gumanitar yardım noqtası zarar kördi.
İlk malümatqa köre, üç insan yaralandı.
Bir sıra şaatlıqqa baqmadan, Rusiye Ukrayınada vatandaşlarğa ateş etmey, dep bildire.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
