Rusiyeniñ Cenübiy okrugınıñ arbiy mahkemesi qırımtatar faali Server Bariyevge 360 biñ ruble para cezasını berip, onı 1,5 yıl devamında internetni qullanmaq aqqından marum qaldırdı. Cinaiy davanıñ sebebi «VKontakte» içtimaiy ağında paylaşqan İslâm timsalleri oldı, dep haber ete «Qırım birdemligi».
Server Bariyev «VKontakte» içtimaiy ağında «Ar-raya» gazetasınıñ maqalesini yerleştirdi, onı Rusiye FSBsiniñ hadimi «Hizb ut-Tahrirniñ propagandası» olaraq tasnif etti. Server Bariyev FSBde olğanda «VKontakte» içtimaiy ağında bu maqaleni paylaşqanını ve silmege azır olğanını tasdıqladı. «Ar-Raya» gazetası islâm siyasiy firqasınıñ parasına er afta arapça derc etilgen bir neşirdir.
Qırımdaki Rusiye FSBsiniñ tahqiqatçısı Aleksandr Lavrov 2016 senesinden berli Server Bariyev «VKontakte» içtimaiy ağında Rusiye Federatsiyasında yasaqlanğan «Hizb ut-Tahrir» islâm firqasınıñ mefküresinen tanış oldı» ve «terrorizm mefküresini doğru, qoltutulacaq ve ibret alınacaq olaraq kördi».
Qadı Sergey Gorelov Server Bariyevge qarşı Rusiye Ceza kodeksiniñ 205.2 maddesiniñ 2-nci qısmına istinaden («Terror faaliyeti, terrorizmni açıq aqlav ya da terrorizm propagandası») qabaatlayıcı qarar çıqardı.
Berilgen malümatqa köre, Bariyev para cezasını er ay 10-ar biñ ruble olaraq töley bile – 3 yıl devamında. Bariyevniñ cep telefonı ve sim-kartı «cinayet yapuv vastaları» olaraq yoq etilecek. Server Bariyev 1,5 yıl devamında «internet saifelerini idare etip olamaycaq». Qadı internet qullanıluvına «sayt idare etilüvi» dedi.
«Bir buçuq yıl internetsiz yaşap olursıñız, bir şey olmaz, eñ qorqunç şey degil, dep tüşünem. Mahkeme böyle bir şeyni ilk sefer yapqanıñızğa emiyet berdi. Kelecegiñiz siziñ elleriñizde», – dedi qadı Görelov.
Berilgen malümatqa köre, munaqaşa vaqtında Rusiye prokurorı Sergey Aydinov Bariyevge 500 biñ ruble para cezasını bermege ve 5 yıl devamında internet saifelerini idare etüvni yasaqlamağa rica etti.
Server Bariyev – Qırımdaki Aqşeyh qasabasında yaşağan 28 yaşında tişçi ve cemaat faali. Al-azırda zenaatı boyunca çalışmay. «Qırım birdemligi» qayd etkenine köre, Bariyev «yarımada statusı ve qırımtatarlarğa qarşı repressiyalarğa olğan munasebeti» sebebinden Rusiye uquq qoruyıcıları tarafından basqığa oğratılğan edi. Bariyevniñ aytqanına köre, 2019 senesinden berli o, Ekstremizm ile küreş merkeziniñ hadimleri onı ziyaret etken soñ taqip etilgenini körip başladı.
2022 senesi aprelniñ 7-nde Rusiye uquq qoruyıcıları Bariyevniñ evini tintti. Onı bir yerge ketmeycek şartınen yibergenler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
