Qırımnıñ cenk yolunen işğalden qurtarıluvı halqara uquqqa zıt kelmey, çünki Ukrainanıñ özüni imaye etmege aqqı bar. Bu aqta «KrımSOS» talilcisi Yevğen Yaroşenko «NV» radiosına izaat berip ayttı.
«Daa evel, Qırımnıñ keri alınması aqqında aytıp, siyasiy-diplomatik vastalarnı baqqan edik. Cenkni degil. Şimdi, Rusiye büyük istilâ yapqan soñ, Ukraina Silâlı quvetleri ise Rusiye istilâsına qaramanca tirengende, işğalci ordunıñ askerleri eksilgeninen, yani istilâğa qarşı çıqılsa, Ukrainanıñ cenübi, şarqı azat etilse, Rusiyeniñ arbiy küçü zayıflar. Sanktsiyalar sebebinden Rusiye Federatsiyasınıñ iqtisadiy küçü de zayıflar. Ve bu sebepten Qırımnı keri aluv yollarından tek iqtisadiy, sanktsion vastalarnı degil, arbiy yollarnı da red etmege kerekmey. Bundan ğayrı, Qırımnıñ (arbiy yolnen – QA) keri alınması halqara uquqqa köre olacaq. BM Nizamnamesiniñ 51-inci maddesi er bir devletke şahsiy ya da umumiy mudafaa aqqına izin bere. Ukraina ordusı Qırımğa kirse, bu istilâ sayılmaycaq, çünki Qırım – Ukrainanıñ toprağıdır. Suveren toprağımıznıñ işğalden qurtarıluvı arbiy yollarnen yapıla», – dep bildirdi Yaroşenko.
İyünniñ 17-nde Ukraina prezidentiniñ Qırım Muhtar Cumhuriyetindeki temsilcisi Tamila Taşeva Ukraina akimiyeti Rusiye işğal etken Qırımnı «çeşit usullarnen» keri almaq niyetinde, dep bildirdi.
Ukraina istihbaratınıñ yolbaşçısı Kırılo Budanov bildirgenine köre, Ukraina işğal altındaki topraqlarını ancaq arbiy yolnen azat eter.
Ukraina prezidenti Volodımır Zelenskıynıñ qayd etkenine köre, Rusiye ukrainalılarğa qarşı «qorqunç cinayetlerni» yapqan er seferinde cenkni diplomatik yolnen bitirmek imkânları eksile.
Rusiye Ukrainağa er taraftan ücüm etmezden evel Ukraina akimiyeti Qırımnı diplomatik yolnen keri almağa istey, dep bildirgen edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
