Ukraina akimiyeti Rusiye işğal etken Qırımnı «er angi usulnen» keri almağa niyetlene, dep bildirdi Ukraina telemarafonınıñ yayınında Ukraina prezidentiniñ Qırım Muhtar Cumhuriyetindeki daimiy vekili Tamila Taşeva.
«Fevralniñ 24-nden soñ Qırımnı qaytaruv meselesi deñişti. Biz birinciden Ukraina Silâlı quvetlerine işanğanımıznı añlaymız. Ve, ebet, Reznikov (Ukraina mudafaa naziri – QA) aytqanı kibi, Ukraina prezidenti ve devletniñ bir çoq temsilcisi aytqanı kibi, topraqlarımıznı keri almaq içün kerek olğan bütün usullarnı qullanacaqmız», – dep ayttı Taşeva.
Aqyarnıñ Rusiye yolbaşçısı Mihail Razvojayev Taşevanıñ aytqanlarını izaatlap, «Qırım – Rusiyedir, Aqyar – federal seviyeli rus şeeri, Rusiye Qara deñiz flotunıñ baş bazasıdır», dep ayttı.
Ukraina istihbaratınıñ yolbaşçısı Kırılo Budanov Ukraina işğal altındaki topraqlarnı ancaq küç qullanıp azat eter, dep ayttı.
Ukraina prezidenti Volodımır Zelenskıynıñ qayd etkenine köre, Rusiye ukrainalılarğa qarşı «qorqunç cinayetlerni» yapqan er seferinde cenkni diplomatik yolnen bitirmek imkânları eksile.
Rusiye Ukrainağa er taraftan ücüm etmezden evel Ukraina akimiyeti Qırımnı diplomatik yolnen keri almağa istey, dep bildirgen edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
