Hersonda iyünniñ 18-nde Rusiye akimiyeti tarafından «Cezalarnı yerine ketirüv hızmetiniñ idare» reberi olaraq tayin etilgen Yevgeniy Sobolevniñ maşinası yanında patlav oldı. O, hastahanege alındı, dep bildirdi TASS Rusiye devlet haber agentligi.
Sobolevniñ arabası yanında terekke bağlı bomba patladı. Sobolevden ğayrı maşinasınıñ aydavcısı ve yanından keçken ayaqmaşinacı zarar körgenler. Patlav mesüliyetini kimse öz boynuna almadı.
Rusiye kütleviy haber vastaları menbanıñ malümatına esaslanıp bildirgenine köre, ücümni Ukraina «diversantları» teşkil etti.
Büyük cenk başlamazdan evel Sobolev Hersondaki №90 Ukraina tüzetüv koloniyasınıñ yolbaşçısı edi.
Bu Rusiye zapt etken Ukraina topraqlarında ilk patlav degil. İyünniñ 12-nde Melitopoldeki Ukraina İç işler nazirliginiñ binası ögünde patlav oldı. Mayısta Energodardaki evde patlağan bomba neticesinde Rusiye arbiyleri tarafından «şeerniñ teşkiliy şura reisi» olaraq tayin etilgen Andrey Şevçik yaralanğan edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
