Ukraina, Rusiyege Qırımda arbiy bulunuvnı quvetli seviyede tutmağa ve esas Ukrainağa darbe endirmege imkân bergen Keriç boğazındaki köpürni yoq etmeli. Bu aqta Qırımtatar Milliy Meclisiniñ reisi Refat Çubarov Qırım.Aqiqatqa bergen intervyüsında ayttı.
«Keriç köprü yoq etilmeli – bunda bir şübhe yoqtır. Bu umumen Ukrainanıñ ve Qırımnıñ azat etilüvi içün bir şarttır. Bu bir arbiy ihtiyac», – dep ayttı Çubarov.
Meclis reisi Ukraina Silâlı quvetleriniñ general mayorı Dmıtro Marçenkonıñ Qırım.Aqiqatqa bergen intervyüsını böyle izaatladı. Marçenko, ABD ve Avropa Ukrainağa kerekli silâ yollasa, Keriç köprü «birinci nişan» olacaq, dep ayttı.
«Bu birinci nişan olacaq. Yedeklerni ketirgen esas boru kesilmeli. Bu boru kesilgende telâşlanmağa başlarlar. Ve inanıñız, Aqmescitte ve Qırımda rus bayraqlarınen çapqalağanlar tez-tez Ukraina bayraqlarını çıqarıp çapqalaycaqlar», – dep tahmin etti general mayor.
İyünniñ 16-nda Rusiye Tış işler naziri Sergey Lavrov Rusiye «Ukrainanıñ Keriç köprünen bağlı qorquzuvlarını qayd ete, böyle planlar batacaq», dep cevap berdi.
Arbiy ekspert, Ukraina Silâlı quvetleriniñ albayı Vladıslav Seleznev Qırım.Aqiqat yayınında Keriç köprüniñ yoq etilüvi «Ukraina Silâlı quvetleriniñ pek yahşı strategik tedbiri» olur edi, çünki andan «cenkte iştirak etken Rusiye silâlı quvetleriniñ askerleri, arbiy yükü ve arbiy tehnikası» keçe.
Mayısnıñ 9-nda Ukraina İç işler naziri Viktor Andrusiv Keriç köprü «mıtlaqa yoq etilecek, bu bir zaman meselesidir», dep ayttı.
Ukraina milliy telükesizlik ve mudafaa şurasınıñ kâtibi Oleksiy Danılov imkân olsa, Keriç köprüne darbe endirilecek, dep aytqan edi.
Rusiye Keriç köprüni arbiy tehnikanı Rusiyeden Qırımğa ve keri taşımaq içün qullana.
Rusiye prezidenti Vladimir Putinniñ matbuat kâtibi Dmitriy Peskov Ukraina Milliy telükesizlik ve mudafaa şurasınıñ kâtibi Oleksiy Danılovnıñ Keriç köprüne yapılması mümkün olğan darbe aqqında sözlerini «ilân etilgen terakt» dep adlandırdı. «Bu laflar ola bilecek terror ücüminiñ ilânıdır. Qabul etilmeycek şey, mında ileride cezalanacaq uquqiy teşkerüvge malik olğan areketlerniñ alâmetleri bar».
Rusiyeni işğal etilgen Qırımnen bağlağan Keriç boğazından keçken köpür 2019 senesi açıldı. Onıñ uzunlığı aman-aman 19 kilometr, qurucılıq tahminen 250 milliard ruble oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
