Herson vilâyeti arbiy memuriyetiniñ yolbaşçısı Ğennadiy Lağuta vilâyet sakinleriniñ Rusiye işğal etken Qırımdan çıquvı qanunsız ola, şunıñ içün Ukraina akimiyeti bu yolnı tevsiye etip olamay. Bu aqta o, Azatlıq Radiosınıñ «Novosti Priazovya» intervyüsında ayttı.
«Sıñırnı qanunsız keçüv ola, bunı tevsiye etip olamaymız. Herson vilâyetiniñ «gaulâyterlerinden» biri, satqın ve hain [Kirill] Stremousov (özüni Herson vilâyetiniñ sahte «arbiy-vatandaş memuriyeti reisiniñ muavini» olaraq tanıtqan, bloger) «Qırımğa – buyurıñız, Qırımdan çıqıñız» (Rusiye arbiyleriniñ Kyiv kontrol etken vilâyetlerge çıquv idariy sıñırlar aqqında aytıla – QA). Soñra – Gürcistan ya da istegen yerge ketiñiz. Yani olar yiberecekler, dep qayd eteler. Bu Hersondan çıqmaq içün yekâne yoldır. Bu vatandaşnıñ (yarımadadan çıqacaq olğan – QA) sıñırnı keçüv qaydı olmaycaq. Bu da idariy mesüliyetten cinaiy mesüliyetke qadar ola bile», – dep qayd etti Laguta.
O, Ukraina akimiyeti böyle vatandaşlarğa idariy mesüliyetke çekilmeyceklerini kefil etip olamay, dep ayttı.
«Yapamaymız. Gizlemeyim, anda seferge çıqmaq içün bir çoq deñizci kete. Olar umumiy seferberlik qanunını bozalar, olar askerlikke alınğan 18 yaştan 60 yaşqa qadar erkeklerniñ çıqış yasağı qanunını bozalar. Mence, bunı mahsus organlar yapmalı», – dep qoştı Herson yolbaşçısı.
Keçken afta Rusiye ordusı tarafından işğal etilgen Herson vilâtiyetindeki işğalci küçler esas Ukrainağa çıqmağa yasaq etti. Bu aqta Rusiye arbiyleri tayin etken region yolbaşçısınıñ muavini Kirill Stremousov bildirdi. Onıñ aytqanına köre, Mıkolayıv ve Dnipropetrovsk vilâyetlerine çıqışlarnı yasaqlamaq qararı «toqtamağan ateş telükesinen» bağlı. Regiondan işğal etilgen Qırımga ya da Rusiye ordusı kontrol etken Zaporijjâ vilâyetine ketmek mümkün.
Rusiye ordusı fevralniñ 24-nde Ukrainağa ücüm etken soñ Herson ve Zaporijjâ vilâyetleri qısmen Rusiye ordusınıñ kontroli altında qaldı. Herson vilâyetiniñ büyük qısmı ve Zaporijjâ vilâyetiniñ aman-aman yarısı aqqında aytıla. Zaporijjâ şeeri Ukraina tarafından kontrol etile.
Ukrainağa qarşı istilâ başlağan soñ Vladimir Putin ve Rusiye vekilleri onıñ maqsadı Ukraina topraqlarınıñ işğali degil, dep aytqan edi. Faqat Rusiye ordusı zapt etken Ukraina cenübiniñ rayonlarında Rusiye kontrolindeki memuriyetler quruldı, olarnıñ reberleri Herson ve Zaporijjâ vilâyetleri Rusiye terkibine alınmalı, dep aytıp başladı.
Mayısnıñ 25-nde Rusiye prezidenti Vladimir Putin Ukrainanıñ Zaporijjâ ve Herson vilâyetleriniñ sakinlerine qolaylaştırılğan protsedurağa köre Rusiye vatandaşlığını berüv buyruğını imzaladı. Bu vesiqa uquqiy malümat resmiy portalında derc etildi. Ferman imzalanğan künü işke tüşürile.
Ukraina prezidenti ofisiniñ buhran ile küreş mesleatçısı Mıhaylo Podolâk «İnterfaks-Ukrainağa» bergen izaatında bu ferman «uquq ceetinden boş», dep bildirdi. Podolâk qayd etkenine köre, mezkür buyruq Putinge iç ealige «umumiy propaganda tesiriniñ elementi» olaraq kerek.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
