Qırımnıñ Rusiye parlamentiniñ spikeri Vladimir Konstantinov ingliz tilini Rusiye mektep programmasından çıqarmağa teklif etti. Bu aqtaTASS Rusiye devlet agentligi haber ete.
«Tiller – menim içün davalı bir mesele, pek davalı: ingliz tilini ne içün taqip etemiz? İnsan bir vaqıt Londonğa barmasa, ne kerek inglizce ögrenmege?», – dep ayttı Konstantinov.
Onıñ fikirince, «başqalarnıñ medeniyetine uymaq telükeli ola".
«[Balanı] mecbur etemiz – o, inglizce bilem ve İngiltere nasıl bir yer olğanını meraq etem, dep aytacaq. Öz tillerimizni ögreneyik, tillerimizni inkişaf ettireyik! İnglizler biznen biñ yıldan berli cenkleşe, biz ise olarnı ögrenmege, ocalarğa para masraf etmege devam etemiz, vaqıt coyamız – soñra tarih içün vaqtımız qalmay», – dep ayttı Konstantinov.
O, mektepte inglizce ögrenmedi, amma biznes işlerinde kerek olğanı içün «eki yılda ögrendi», dep ayttı.
Konstantinovnıñ aytqanına köre, çin, frenk, ingliz ve diger til kursları ayrı olmalı – kerek olğanlar ögrensin.
Qırımlı cemaatçı ve jurnalist Ragim Gumbatovnıñ Qırım.Aqiqatqa aytqanına köre, o, ingliz tilini mektep programmasından çıqaruv teşebbüsini gençlerniñ imkânlarını sıñırlaycaq bir adım dep saya.
Gumbatovnıñ fikirince, «insanlıq ilerileviniñ tarihı diger medeniyetlerni ögrenüvnen sıqı bağlıdır».
«İnsanlar bir-birini tanıdı, ecnebiy ananelernen tanış oldı, yahşı taraflarını aldı, bazı vaqıtları – pek yahşı olmağan taraflarını, medeniyetlerini zenginleştirdi, bilgilerini arttırdı. Meselâ, bugün aman-aman bütün dünya arap raqamlarını qullana, bu çoq şeyni qolaylaştıra. İmkânım olsa, farqlı medeniyetlerni quvana-quvana ögrenir edim. İngliz medeniyeti insanlıq potentsialınıñ inkişafı içün yahşı çalıştı. İngliz tili ise dünyanı tanımaq içün sıñırsız imkânlar bere, ayatta muvafaqiyetli olmaq içün daa bir fırsat. Yahşı bir şey yasaqlansa, onıñ yerine bir şey teklif etilmeli. İngliz tilini ögretüv yasağı, mence, yahşı bir şey degil», – dep ayttı cemaatçı.
Bundan evel Konstantinov Rusiye haber boşluğını «tilimizni çirkinleştirgen» çeşit alınma sözlerden temizlemege teklif etken edi.
Bundan ğayrı, Qırımnıñ Rusiye parlamentiniñ spikeri işğal etilgen Qırımda ocalarğa Rusiye arbiyleri zapt etken Herson vilâyetinde ders bermege ögreteler, dep aytqan edi.
Rusiye fevralniñ 24-nde Ukrainağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrainadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrainanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrainanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
