Aqyarnıñ bazarlarında «Hersondan ketirilgen» meyva ve yemişler ve Ukraina aşayt mahsulatı satıla. Bu aqta Qırım.Aqiqat mühbiri bildire.
Bu malümatqa köre, reklaması «Herson» olaraq yapılğan ilk mallar taze qartop ve hıyar oldı. Fiyatı – Aqyardakilernen aynı, bir kilogramm içün 50-60 ruble. Aqyarda yemiş mevsimi başlağanınen «Herson» cileginiñ kilogrammı 150-200 rubleden satıla. Bu orta bazar fiyatından daa ucuzdır. Cilek er kün ketirile, aynı yerlerde satıla.
Esas Ukrainada ketirilgen kibi kösterilgen mallarnıñ fiyat levhalarında satıcılar «pek lezzetli», «balalıq tadı», «eñ güzeli», «Ukrainadan selâm» dep yazalar.
Aqyarnıñ alış-veriş merkezlerinde Ukraina parfümleri ve gigiyena vastaları da satıla – şampun, krem, yağlar. Rusiyeniñ Ukrainağa qarşı başlatqan cenkinden soñ bularnıñ fiyatı 50-70% arttı.
Herson vilâyetindeki Rusiye işğalci akimiyeti regionda eki paralı alan olacaq, dep bildirdi.
Mayısnıñ başında «Yedinaya Rossiya» baş şurasınıñ kâtibi Andrey Turçak Hersonnı ziyaret etip, «Rusiye mından ketmeycek», dep ayttı.
Mayısnıñ 11-nde Herson işğalci akimiyetiniñ vekili Kirill Stremousov Herson vilâyetini Rusiyege «qoşmaq» niyeti aqqında ayttı. Rusiye prezidentiniñ matbuat kâtibi Dmitriy Peskov Herson vilâyetiniñ Rusiye ilhaqı içün «tam bir uquqiy sebep» olmalı, dep bildirdi.
Ukraina akimiyeti, Rusiye Ukrainada hırsızlağan zahireni öz toprağına ve işğal altındaki Qırımğa çıqarmağa devam ete, dep bildirdi. Rusiye akimiyeti bunı izaatlamadı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
