«Gazetanıñ qolay vaqtı olmay». Şevket Qaybullayev – «Avdet» qırımtatar gazetası aqqında (video)

«Avdet» gazetası – qırımtatar sürgünliginden soñ qırımtatarlar içün basılğan neşir. 31 yıl evelsi çıqıp başlağan «Avdetniñ» dört baş muarriri deñişti, muarririyet bir qaç kere köçti, beş biñlik nushadan ise tek 999 nushası qaldı. Şimdiki baş muarriri Şevket Qaybullayev 2000-lerde idare etip başladı, resmiy şekilde ise 2005 senesi reberi oldı: «2004-niñ soñunda gençlerge teklif ettim, amma razı olmadılar ve bir sanında «baş muarrir Şevket Qaybullayev» dep yazıldı. Balalar özleri saylağan ekenler». Neşir bugün de Qırımda bar, özüni mustaqil qırımtatar kütleviy haber vastası olaraq köstere. Gazetanıñ esas maqsadı, eskiden olğanı kibi, qırımtatar kimligini saqlav ve halqnıñ aktual meselelerini aydınlatuv ola. «Gazetanıñ qolay vaqtı olmay, er daim kerginlikte çalışasıñ», – dep ayttı Qaybullayev. Aprelniñ 10-nda qırımtatar jurnalistikası künü munasebetinen Qırım.Aqiqat Şevket Qaybullayevnen körüşti. Gazetanıñ şimdiki vaziyeti, Qırımnıñ Rusiye işğalinden soñ kütleviy haber vastalarınıñ iş deñişüvleri aqqında laf etildi.